Қозоғистоннинг Олмаота шаҳрида буюк астроном ва Мовароуннаҳр ҳукмдори Мирзо Улуғбек ҳаёти ҳамда илмий меросига бағишланган «Мирзо Улуғбек. Осмон тоқига қўйилган нарвон» ҳужжатли фильми премьераси бўлиб ўтди. Бу ҳақда Ислом Каримов фонди Telegram-каналида хабар берилди.
Ушбу фильм Каримов Фондининг раҳбари Лола Каримова-Тиллаева ҳамда унинг турмуш ўртоғи Тимур Тиллаев продюсерлигида суратга олинган.
Киноасар намойиши 5—7 декабрь кунлари Темирбек Жургенов номидаги Қозоғистон миллий санъат академиясида бўлиб ўтган Марказий Осиё ҳужжатли фильмлар форуми доирасида ўтказилди.
Форум иштирокчилари ушбу ижодий лойиҳанинг кўлам-қамровини алоҳида қайд этиб, минтақада яшаб ўтган буюк тарихий сиймоларнинг шахсиятини теран очиб берувчи бу каби фильмларни суратга олиш ҳаётий зарурат эканини таъкидлади. Премьера асносида кечган муҳокамаларда мутахассислар Марказий Осиё халқларининг тарихи, маданияти ва анъаналари муштарак эканини алоҳида қайд этди.
– «Мирзо Улуғбек. Осмон тоқига қўйилган нарвон» ҳужжатли фильмини томоша қилгач, қалбимда ғурур ва қувонч уйғонди. Мирзо Улуғбек – тамаддунимизнинг бебаҳо хазинасидир. Сирасини айтганда, ушбу ҳужжатли фильм орқали миллатнинг тарихий қадр-қимматини англаш мумкин, – дея ўз таассуротлари билан бўлишди Қозоғистон миллий санъат академияси ректори Асхат Майемиров.
Форум доирасида Ўзбекистон, Тожикистон ва Қозоғистон ҳужжатли киноусталари томонидан суратга олинган 19 та фильм намойиш этилди.
– Форум давомида тақдим этилган фильмлар Осиё минтақамизнинг янги қиёфаси қандай эканини кўрсатади. Ушбу портретни ўтмиш ва бугунни уйғунлаштирувчи, турфа иплардан тўқилган яхлит матога муқояса қилиш мумкин. У эса серқирра ва серқатлам тарихимизни теран идрок этиш ва ундан ибратланишга ундайди, – дейди Форум ташаббускори, ҳужжатли фильмлар режиссёри Асия Байгожина.
Изоҳ (0)