“Манчестер Сити” бош мураббийи, испаниялик мутахассис Хосеп Гвардиола 2025/26 йилги мавсумдан бошлаб “Милан” жамоасини бошқариши мумкин. Бу ҳақида La Gazzetta dello Sport нашрига таяниб Championat хабар бермоқда.
Манбага кўра, Милан клуби спорт директори лавозимига Фабио Паратичи тайинланса, Гвардиоланинг Италияга келиши ҳақиқатга айланиши мумкин. Сабаби улар ўртасидаги илиқ муносабатлар мавжуд.
Таъкидланишича, “Милан” Паратичи билан келаси мавсумдан ҳамкорлик қилиш борасида оғзаки келишувга эришган. Аввалроқ Гвардиола қайд этилаётган ёмон натижалар фонида жорий мавсум якунида “Сити”ни тарк этиши мумкинлиги ва у бошқа жамоалардан таклиф кутаётгани ҳақида хабарлар тарқалган эди.
Миш-мишларга қарамай, ҳозирча “Милан”ни бошқариш учун асосий номзод сифатида “Марсель” жамоасининг устози Роберто Де Зерби кўрилмоқда. Аммо “россонерилар“ Гвардиола билан келишувга эриша олса, Италия клуби Де Зерби номзодидан воз кечига тайёр.
Шунингдек, Бразилия Футбол Конфедерацияси (CBF) ҳам Гвардиолани терма жамоа бош мураббийлигига жалб қилиш ниятида экани ҳақида хабарлар тарқалган. “Пентакампеонлар” яқинда ишдан бўшатилган Доривал Жуниор ўрнига испаниялик мутахассисни тайинлашни мақсад қилган.
Маълумот учун, Гвардиола 2016 йилдан буён “Манчестер Сити”ни бошқариб келмоқда. Унинг инглиз клуби билан шартномаси 2027 йил ёзигача амал қилади.
Изоҳ (0)