АҚШнинг Техас штатида 4 июль куни бошланган сув тошқинлари оқибатида ҳалок бўлганларнинг сони 100 нафардан ошди. Бу ҳақда BBC хабар берди.
Қидирув-қутқарув гуруҳлари дарё қирғоқларида жабрланганларни излашда давом этмоқда. Ҳудудда яна ёмғир ёғиши ва момақалдироқ кузатилиши прогноз қилинган.
Camp Мйстиc христиан ёзги лагери сув остида қолиши оқибатида 27 нафар қиз ва ходимлар ҳалок бўлган. Яна 10 нафар қиз ва лагер маслаҳатчиси бедарак йўқолган.
Қурбонларнинг камида 84 нафари — 56 нафар катталар ва 28 нафар болалар — Керр округида ҳалок бўлган. Ҳудуддаги Гуадалупе дарёсининг сув сатҳи 4 июлдан бери кучли ёғингарчилик туфайли кўтарилиб кетган. 32 нафар йўқолганларнинг шахсига ҳали ҳам аниқлик киритилмаган.
Трамп маъмуриятининг танқидчилари фалокатни Миллий об-ҳаво хизмати бош агентлиги — Миллий океан ва атмосфера маъмуриятидаги минглаб иш ўринларининг қисқариши билан боғлаган. Оқ уй эса бу қисқартириш табиий офат билан курашишда тўсқинлик қилмаслигини айтган.
Оқ уй матбуот котиби Каролин Ливитт айбловларга шундай жавоб берди: “Бу Худонинг иши. Тошқин маълум вақтда содир бўлгани учун маъмуриятнинг айби йўқ. Лекин аҳоли олдиндан огоҳлантирилган”.
Унинг таъкидлашича, об-ҳаво идораси тошқин арафасида маҳаллий амалдорлар учун брифинглар ўтказган. Шу ҳафта охирида мамлакат президенти Дональд Трамп Техасга ташриф буюриши кутилмоқда. Ундан федерал ҳукуматнинг қисқартиришлари табиий офатга қарши курашга тўсқинлик қилган-қилмагани ҳақида сўралган. У бунга жавобан Байден даври ҳукуматини айбдор қилиб кўрсатган.
Изоҳ (0)