Покистонда тошқин қурбонлари сони 1136 кишига етди. Бу ҳақда мамлакат матбуотига таяниб, «Интерфакс» хабар берди.
Покистоннинг Хайбер-Пахтунхва провинциясида тошқин хавфи ҳамон сақланиб қолмоқда.
Миллий фавқулодда вазиятлар бошқармаси (НДМА) маълумотларига кўра, тахминан 1634 киши жароҳатланган ва 735 мингдан ортиқ уй ҳайвонлари йўқолган.
Аввалроқ сув тошқинидан мамлакатдаги 33 миллион киши жабр кўргани, бир миллионга яқин хонадонга зарар етгани хабар қилинганди.
Покистон бош вазири Шаҳбоз Шариф мамлакат сўнгги ўн йилликлардаги энг кучли ёмғирлардан азият чекаётгани ва бу кучли сув тошқинларига олиб келгани ҳақида айтган.
Унинг сўзларига кўра, ёмғир билан боғлиқ ҳозирги вазият — «сўнгги 30 йил ичида мисли кўрилмаган».
Айни пайтда Покистон турли давлатлардан халқаро ёрдам олишни бошлади. Жумладан, Туркия ва Бирлашган Араб Амирликларидан чодирлар ва зарур маҳсулотлар ортилган самолётлар етиб келди.
Покистон расмийларига кўра, бу йил сув тошқинлари билан боғлиқ вазият 2010 йилга қараганда жиддийроқ, ўша йили табиий офқат оқибатида 1,7 минг киши ҳалок бўлган.
Мавзуга доир: Покистонда сув тошқинлари 2 кунда 126 кишининг умрига зомин бўлди (видео)
Изоҳ (0)