Австралияда кучли ёмғир ёғиши ортидан йирик сув тошқинлари юзага келди. Мамлакатда об-ҳавонинг кескинлашуви ҳақида огоҳлантирилган, деб ёзади Reuters.
Австралия шимолидаги чекка ҳудудда автомобилини йўлда сел ювиб кетгач, олти соатдан кўпроқ вақт давомида дарахтга ёпишиб турган эркак полиция томонидан қутқарилди.
Қайд этилишича, эркак аввалига машинаси ичида қамалиб қолган. Сўнг ундан чиқишга муваффақ бўлган ва ёрдам кутаётиб, дарахтни маҳкам ушлаб олган.
Қутқарувчиларга эркакни хавфсиз жойга олиб ўтиш учун олти соатдан кўпроқ вақт керак бўлди. Сув сатҳи пасая бошлаганда у арқон билан қутқариб олинди. Эркак жабрланмаган.
Маҳаллий оммавий ахборот воситаларининг хабар беришича, Квинсленд жануби ва Янги Жанубий Уэльснинг шимоли-шарқида кескин об-ҳаво, даҳшатли шамол ва кучли ёмғир ҳақидаги огоҳлантиришлар ўз кучида қолмоқда.
Аввалроқ Хитой шимолидаги Шанси провинциясида бир ҳафта тинмаган кучли ёмғир кенг кўламли сув тошқинларини келтириб чиқарганди. Оқибатда минтақадаги 1 миллион 760 минг кишини эвакуация қилишга тўғри келган.
Шунингдек, Лондонда кучли ёмғир ёғиб, оқибатда сув тошқини юз бергани ва бир нечта метро линиялари ёпилгани ҳақида хабар берилганди.
Эслатиб ўтамиз, иқлимни ўрганувчи Climate Central ташкилоти 2030 йилга келиб сув остида қолиши мумкин бўлган шаҳарлар рўйхатини эълон қилди.
Изоҳ (0)