АҚШнинг Техас штатида юз бераётган тошқинлар оқибатида ҳалок бўлганларнинг сони 82 нафарга етди. Бу ҳақда CNN хабар берди.
Ҳалок бўлганлар орасида Керр округида яшовчи 28 нафар бола бор. Қуйида 6 июль кунги қурбонларнинг округлар бўйича тақсимоти келтирилган:
- Керр округида 68 та;
- Travis округида 6 та;
- Бурнет округида 3 та;
- Кендалл округида 2 та;
- Уиллямсон округида 2 та;
- Том Грин округида 1 та ўлим.
Штат губернатори Грег Эбботтнинг айтишича, ўнлаб одамлар бедарак йўқолган. Сув тошқинлари ва кучли ёмғир Техаснинг баъзи қисмларида яна давом этади. Расмийлар Керр округидаги Хант жамоаси аҳолисини сув тошқини эҳтимоли туфайли 7 июль куни тушдан кейин баландроқ жойга кўчиб ўтишга чақирмоқда. Техас ҳаво-десант қутқарув экипажлари 4 июлдан бери қутқарув ишларини тун-у кун олиб бормоқда.
“Қутқарув ишлари тўхтовсиз амалга оширилмоқда. Вертолёт қутқарилганларни тезда хавфсиз жойда қолдириб, яна қолганларнинг ҳаётини сақлаб қолиш учун тинимсиз ҳаракат қилмоқда. Бу менинг ҳаётимдаги энг муҳим вазифа”, деди қутқарувчилардан бири.
Миллий об-ҳаво хизмати аҳолини “ҳаёт учун хавфли сув тошқини” ҳақида огоҳлантирган. 4 июль куни олинган хронометраж Техаснинг Кингсленд шаҳридаги Ллано дарёси бўйлаб тошқин сувлари қанчалик тез кўтарилганини кўрсатади.
Сув тошқини 4 июль эрталаб Гуадалупе дарёси бўйида, Сан Антониодан 100 км шимоли-ғарбда бошланганди. Кучли ёмғир сабаб сув дарё қирғоқларидан чиқиб, оромгоҳлар, йўллар ва уйларни босган. Фалокатдан энг кўп зарарни Керр, Travis, Бурнет ва Кендалл округлари кўрган.
Изоҳ (0)