Барселона маркази бўйлаб 15 июнь куни намойишлар бўлиб ўтди. Унда маҳаллий аҳоли сайёҳларни шаҳарни тарк этишга чақирган. Бу ҳақда BBC хабар берди.
Намойишчилар Барселона кўчалари бўйлаб юриш қилар экан, уларни суратга олаётган сайёҳларга “Уйга қайтинг!” дея бақирган. Кўча қаҳвахоналарида ўтирган сайёҳларга ўйинчоқ сув тўппончалари билан сув сепилган. Уларнинг баъзилари кийим-кечак дўконларига қамалиб олгани айтилмоқда.
Туризм Испания учун жуда муҳим ҳисобланиб, Барселона ташриф буюрувчилар томонидан энг кўп танланадиган жойдир. Аммо уларнинг миқдори шу қадар тез ўсмоқдаки, кўплаб маҳаллий аҳоли ўз шаҳарларидан сиқиб чиқарилаётганидан шикоят қилмоқда.
“Биз бу шаҳарда яшай олмаймиз. BnB (уй-жой ижара хизматлари), шунингдек, об-ҳаво сабабли бу ерга келиб яшайдиган экспатлар туфайли ижара ҳақи жуда юқори. Мақсадимиз туризмни тўхтатиш эмас. Туризм фойдали, аммо уни нормал даражада ушлаб туриш керак”, деди маҳаллий аҳоли вакилларидан бири.
Намойишчилар Барселонанинг энг диққатга сазовор жойларидан бири, каталониялик меъмор Гауди томонидан лойиҳалаштирилган Саграда Фамилиа баланд черкови томон йўл олган. Бу ҳудуд 2024 йили шаҳарга 15 миллиондан ортиқ меҳмонни жалб қилганди. Бу эса маҳаллий аҳоли сонидан деярли ўн баравар кўп.
80 ёшли Пепи Виу яқиндагина қарийб ўн йиллик уйидан ҳайдаб юборилган. Унга кўра, уй эгаси нафақахўр тўлаши мумкин бўлганидан кўпроқ ижара ҳақи олишни хоҳлаган. Пепи ҳозирда ётоқхонада бўлиб, ўзига мосроқ жой қидирмоқда. Аммо у охирги марта ижарага уй олганидан бери нархлар деярли 70 фоизга ошиб кетган.
“Ҳеч қандай қўллаб-қувватловчи йўқ. Ҳозир фақат туристик квартиралар мавжуд, лекин биз аҳолига яшаш учун жой керак!”, деб интервью берган қария.
Намойишлар босими остида Барселона ҳукумати 2028 йилдан бошлаб сайёҳларга қисқа муддатли ижарага беришни бутунлай тақиқлаш бўйича радикал қадам ташлаган. Унга кўра, 10 мингта уй эгаси туристик уй-жой лицензиясини йўқотади.
Изоҳ (0)