Испаниянинг Барселона ва Мадрид шаҳарларида «Ўзбекистон ҳаво йўллари» миллий авиакомпаниясининг Тошкент — Барселона — Тошкент йўналишида доимий қатновларнинг йўлга қўйилиши тақдимоти бўлиб ўтди. Тақдимотда Ўзбекистоннинг туризм салоҳияти ҳам намойиш этилди, деб хабар беради миллий авиакомпания матбуот хизмати.
Мазкур тадбир «Ўзбекистон ҳаво йўллари» миллий авиакомпанияси, Испания Қироллигининг Ўзбекистондаги элчихонаси, Каталониянинг туризмни ривожлантириш бўйича қўмитаси, шунингдек Тошкентдаги Испания виза маркази томонидан ташкил этилди. Унда Каталония ҳукумати ва ишбилармонлар доираси вакиллари, етакчи маҳаллий сайёҳлик компаниялари ва ОАВ вакиллари иштирок этди.
Тақдимот жараёнида Ўзбекистоннинг тарихий-маданий мероси, машҳур диққатга сазовор масканлар ва миллий авиаташувчининг имкониятлари ҳақида видеороликлар намойиш этилди.
Миллий авиакомпания мутахассислари Испания ҳукумати вакиллари ва мамлакатдаги етакчи сайёҳлик компаниялари билан қатор учрашувлар ўтказди.
Испаниянинг иккита шаҳарида ўтказилган учрашувлар иштирокчилари Ўзбекистоннинг туризм салоҳиятига катта қизиқиш билдирди ва мамлакатда туризм соҳасида ўтказилаётган ислоҳотларни юқори баҳолади, дейилади хабарда.
Маълумот учун, «Ўзбекистон ҳаво йўллари» МАК жорий йилнинг 24 майидан бошлаб Тошкент — Барселона — Тошкент йўналишида парвозларни амалга ошира бошлайди.
Изоҳ (0)