Самарқандда 16—20 октябрь кунлари БМТ Бутунжаҳон туризм ташкилоти (UNWTO) Бош ассамблеясининг 25-сессияси бўлиб ўтади.
Туризм қўмитаси матбуот хизматининг хабар беришича, Бош ассамблеянинг бу галги сессиясида дунёнинг барча қитъаларидан 130 дан ортиқ давлат иштирок этади. Бу Бош ассамблеянинг аввалги сессияларига нисбатан юқори кўрсаткич ҳисобланади.
Қўмита хабарида қайд этилишича, ушбу нуфузли тадбирнинг Ўзбекистонда ўтказилиши дунё ҳамжамиятининг мамлакатга бўлган эътиборини янада кучайтиради. Негаки Бош ассамблея тадбирларига Бутунжаҳон туризм ташкилотига аъзо барча давлатларнинг оммавий ахборот воситалари, инвесторлар ташриф буюради ва барча учун муҳим ҳисобланади.
Ўзбекистон сайёҳлик брендининг Буюк Британиядаги элчиси Софи Ибботсон ушбу тадбирнинг Ўзбекистон учун аҳамияти ҳақида фикр билдирди.
“UNWTO Бош ассамблеяси 25-сессияси Ўзбекистон учун иккита муҳим аҳамиятга эга. Бу ерда биринчи навбатда бутун дунёдан сайёҳлик ташкилотлари вакиллари йиғилади. Тадбирга UNWTO’га аъзо мамлакатлардан 160 делегация иштирок этиши кутилмоқда. Бу Ўзбекистонга нафақат халқаро туризм соҳасига ҳисса қўшиш, балки келгуси икки йил давомида уни шакллантириш имкониятини ҳам беради”, — деди у.
Унинг қайд этишича, ушбу тадбир муҳимлигининг яна бир сабаби шундаки, Ўзбекистон ўзининг меҳмондўстлиги ва MICE туризми йўналишини намойиш этиш имкониятига эга бўлмоқда (MICE — бу бизнес учрашувлари доирасидаги конференциялар ва тадбирлардир).
Софи Ибботсон Ўзбекистоннинг қайси туристик йўналишлари Европа Иттифоқи давлатларидан чет эллик сайёҳларни жалб этиши ҳақида ҳам гапирди.
“Ўзбекистонга саёҳат қилиш хорижлик сайёҳлар учун жозибадор, ҳаяжонли, ўта экзотик, шу билан бирга, жуда хавфсиз ва ҳамёнбопдир. Шунингдек, турли миллий маҳсулотлар ҳам сайёҳларнинг эътиборини жалб қилади.
UNWTO Бош Ассамблеяси доирасида “Энг яхши туризм қишлоқлари” номинацияси бўйича тақдирлаш маросими ҳам ўтказилади. Бу рўйхатга Ўзбекистоннинг бешта туризм қишлоғи ҳам киритилгани қувонарлидир. Туризм қишлоқлари — Ўзбекистон учун маҳаллий ва хорижлик сайёҳларга қишлоқ аҳолиси ҳамда уларнинг турмуш тарзи билан мулоқот қилиш имконини берувчи ажойиб янги йўналишдир”, — деди у.
UNWTO Бош ассамблеяси доирасида Самарқандда Халқаро Инвестиция форуми, Халқаро таълим форуми, “Энг яхши туризм қишлоқлари”ни тақдирлаш маросими, шунингдек, қатор ялпи сессиялар ва маданий тадбирлар бўлиб ўтади.
Изоҳ (0)