Texas markaziy hududida kuchli suv toshqini yuz berdi. Qurbonlar bor. Axios xabariga ko‘ra, falokat hozirga qadar kamida 51 nafar amerikalikning hayotiga zomin bo‘lgan. Ular orasida qizlar oromgohi tarbiyalanuvchilari ham bor.
Nimalar ma’lum?
Suv toshqini 4-iyul ertalab Guadalupe daryosi bo‘yida, San-Antoniodan 100 km shimoli-g‘arbda boshlangan. Kuchli yomg‘ir sabab suv daryo qirg‘oqlaridan chiqib, oromgohlar, yo‘llar va uylarni bosgan. Falokatdan eng ko‘p zararni Kerr, Travis, Burnet va Kendall okruglari ko‘rgan.
Kerr okrugida joylashgan Mystic xususiy oromgohi hududidan 43 jasad topilgan. Ularning 12 nafari kattalar, 5 nafari bolalar bo‘lib, hozircha shaxsi aniqlanmagan. Fojia vaqti oromgohda bo‘lgan 27 nafar qiz yo‘qolganlar ro‘yxatida.
Qo‘shni okruglarda yana 8 nafar qurbon tasdiqlangan. Halok bo‘lganlar orasida Mystic oromgohi direktori Dik Istlend va 8–9 yoshli qizlar bor: Lila Bonner, Jeyni Xant, Sara Marsh.
“Jasadlar solingan ko‘plab xaltalarni o‘z ko‘zim bilan ko‘rdim. Bu yurakni ezadi”, dedi Kerr okrugi sudyasi Rob Kelli.
AQSH Ichki xavfsizlik vaziri Kristi Noem erta ogohlantirish tizimini zamonaviylashtirishga va’da berdi.
“Qutqaruv ishlari davom etmoqda. Qidiruv guruhlari itlar, dronlar va vertolyotlardan foydalanyapti. Yomg‘ir to‘xtamayapti, ba’zi hududlarda suv sathi oshishda davom etadi”, degan u.
Texasda suv sathi atigi 45 daqiqa ichida 8 metrga ko‘tarilib, yo‘llarni va tez yordam mashinalarini ham oqizib ketgan. Ayrim joylarda suv balandligi 9 metrga yetgan.
Izoh (0)