Танзанияда сув тошқини оқибатида 40 дан ортиқ одам ҳалок бўлди (видео)

Танзанияда дам олиш кунлари ёғган кучли ёмғирлар натижасида катта кўчкилар содир бўлди, оқибатда камида 47 киши ҳалок бўлди.

Маҳаллий ҳокимият томонидан эълон қилинган сўнгги маълумотларга кўра, Танзанияда юз берган кучли ёғингарчилик оқибатида 47 киши ҳалок бўлди, 85 киши жароҳатланди. Мамлакат расмийларининг айтишича, қурбонлар сони “кўпайиши мумкин”, деб ёзади DailyMail.

Яқин вақтгача мисли кўрилмаган қурғоқчиликни бошдан кечирган Шарқий Африкада бир неча ҳафта давомида кучли ёмғир ва Эл-Ниньо об-ҳаво ҳодисаси билан боғлиқ сув тошқинлари кузатилди.

Ўтган ой кучли ёмғирлар Танзания бўйлаб мол-мулкни вайрон қилган ва деҳқонларнинг экинларига зарар етказган.

Эл Ниньо — Экваториал Тинч океанининг марказий ва шарқий зоналарида сувнинг сирт қатлами ҳарорати аномал даражада ошиши билан тавсифланган табиий ҳодиса. Бу баъзи ҳудудларда қурғоқчиликка, баъзиларида эса кучли ёмғирга олиб келиши мумкин.

Аввалроқ Индонезиянинг Суматра оролида кучли ёмғир сув тошқини ва кўчкига сабаб бўлган, камида 12 киши бедарак йўқолган эди.