8 май куни АҚШ президентининг рафиқаси Жилл Байден ва Канада бош вазири Жастин Трюдо олдиндан эълон қилинмаган ташриф билан Украинага келди.
Жилл Байден Ужгородга ташриф буюрди ва у ерда Украина президентининг рафиқаси Олена Зеленская билан учрашди. Биринчи хонимлар маҳаллий мактаблардан бирига борди, мактабда уруш сабаб ўз уйларини тарк этишга мажбур бўлган украиналиклар жойлашган эди.
Шунингдек, 8 май куни Канада бош вазири Жастин Трюдо ҳам Украинага келди. Канада ҳукумати раҳбари Ирпен шаҳрига ташриф буюрди.
Шаҳар мерининг сўзларига кўра, Трюдо кўрган манзарасидан – ҳарбий объектлар эмас, турар жой биноларига ўт қўйилиб, вайрон қилинганидан ҳайратда қолган.
Украинага Трюдо ва Байден хонимдан ташқари шу куни Германия ва Норвегия парламентлари раҳбарлари Бербел Бас ва Масуд Гарахонийлар келишди. Украина президенти Владимир Зеленский улар билан учрашув ўтказганини ўзининг Telegram-каналида маълум қилиб, парламент раисларига ҳам Киевга ташрифи, ҳам уларнинг мамлакатлари уруш пайтида кўрсатган ёрдами учун миннатдорчилик билдирди.
1 май куни АҚШ Конгрессининг қуйи палатаси спикери Нэнси Пелоси кутилмаган ташриф билан Киевга келганди. Бунга қадар АҚШ давлат котиби Энтони Блинкен ва мудофаа вазири Ллойд Остин Украина пойтахтига ташриф буюрган эди. Зеленский билан учрашув давомида улар америкалик дипломатларни Украинага қайтаришга ва яна ҳарбий ёрдам юборишга ваъда берган. 28 апрель куни эса Киевга БМТ бош котиби Антониу Гуттериш келган. Унинг ташрифи чоғида Киев марказига ракеталардан зарба берилган.
Изоҳ (0)