Техаслик 71 ёшли аёл “мияни кемирувчи амёба” дейиладиган ҳалокатли амёба паразити билан касалланиб вафот этди. Бу ҳақда Zerkalo News хабар берди.
Фанда Naegleria fowleri деб номланувчи касаллик жуда камёб, аммо ўлимга олиб келади. Фожиага унинг кўчма уйидаги цистернада сақланаётган қайнамаган сув билан бурнини чайгани сабаб бўлган.
Касалланган аёл амёба одатда яшайдиган очиқ сув ҳавзалари, масалан, кўл, ҳовуз ёки бассейнларда чўмилмаган. У касаллик аломатлари пайдо бўлишидан олдин 4 кун давомида бурнини ювиш учун кўчма уйининг водопровод сувини қайнатмасдан ишлатган.
Шифокорлар беморга жуда кам учрайдиган, аммо ўлимга олиб келадиган бирламчи амёбали менингоэнсефалит ташхисини қўйган. Даволашга қарамай, биринчи аломатлар пайдо бўлганидан 8 кун ўтгач, аёл оғир асоратлар оқибатида вафот этган.
Марҳуманинг кўчма уйи ва у тўхтаган ҳудуддаги сув таҳлилида Naegleria fowleri инфекцияси аниқланмаган. Бироқ намуналар ифлосланишдан 23 кун ўтгач олинган. Шу билан бирга, сувнинг дезинфекция даражаси пастлиги ва ҳаддан ташқари лойқалиги хавфли микроорганизмлар яшаши учун қулай шароитлар яратгани аниқланган.
Naegleria fowleri 25°C дан юқори ҳароратда фаоллашади ва бурун йўллари орқали мияга етиб боради. Тана ичида у трофозоит шаклига кириб, мияга борадиган йўлда нейронларни йўқ қилади. Касаллик белгиларига бош оғриғи, кўнгил айниши, иситма, чалкашлик, галлюцинация кабилар киради.
Изоҳ (0)