Корея Касалликлар назорати ва профилактикаси бўйича агентлиги (KDCA) мамлакатда биринчи марта Фоулер неглерияси (Naeglaria fowleri) туридаги амёба билан заҳарланиш ҳолати қайд этилганини маълум қилди, у Таиланддан қайтиб келган фуқарода аниқланган.
50 ёшли эркак тўрт ой давомида Жануби-Шарқий Осиёда бўлиб, 10 декабрь куни Жанубий Кореяга қайтган ва эртаси куни касалхонага ётқизилган. У ўтган ҳафта вафот этган.
Беморда менингит белгилари — бош оғриғи, иситма, нутқ йўқолиши, қайт қилиш, энса мушакларининг таранглиги кузатилган. Генетик тест ўтказиш натижасида эркакда Naeglaria fowleri борлиги тасдиқланган.
Naeglaria fowleri — одатда чучук сувли илиқ кўлларда, дарёларда, каналларда ва ҳовузларда учрайдиган амёба. У бурун орқали мияга ўтади ва мия тўқимасини еб қўяди. Шу туфайли ОАВларда ушбу касаллик «мияни еб қўядиган амёба» деб аталади. Ушбу амёба ўлимга олиб келувчи бирламчи амёба менингоэнсефалитни келтириб чиқаради.
KDCA маълум қилишича, амёба одамдан одамга ўтиши эҳтимоли катта эмас, шу билан бирга, маҳаллий аҳолида касаллик аниқланган ҳудудда сув ҳавзаларида чўмилмаслик сўралди.
Маълумотларга кўра, сўнгги 60 йил мобайнида амёба билан заҳарланишга боғлиқ 400 га яқин ҳолат қайд этилган, шуларнинг 150 таси — АҚШда аниқланган. 97 фоиз ҳолатда беморлар ҳалок бўлган. Шу билан бирга, мутахассислар айтишича, бу онда-сонда учрайдиган ҳодисадир, чунки касаллик одамдан одамга юқмайди.
Изоҳ (0)