2024-yil 21-avgust kuni O‘zbekiston Oliy Majlis Senati va Misr arab respublikasi Senati o‘rtasidagi hamkorlikni mustahkamlash maqsadida parlamentlararo do‘stlik guruhlarining birinchi video muloqoti bo‘lib o‘tdi.
![](/static/2024/08/21/sen-4mofQ3rg.jpg)
Uchrashuv kun tartibidan O‘zbekiston—Misr munosabatlarini savdo-iqtisodiy, madaniy-gumanitar sohalarda hamda parlamentlararo yo‘nalishlarida yanada rivojlantirish va hamkorlik ko‘lamini kengaytirish masalalari o‘rin oldi.
O‘zbekiston va Misr o‘rtasida strategik sheriklikka asoslangan munosabatlar ikki mamlakat prezidentlarining tashriflari va muntazam muloqotlari natijasida mazmun va sifat jihatidan yangi bosqichga ko‘tarilib borayotgani alohida qayd etildi.
Uchrashuvda tomonlar umumiy tarixiy, madaniy qadriyatlar hamda urf-odatlarning o‘xshashligi ikki mamlakatning ozaro aloqalarining asosiy omili bo‘lib xizmat qilayotganini ta’kidladi. Madaniy-gumanitar aloqalarni ilm-fan, ta’lim, nodir qo‘l yozmalarni ilmiy o‘rganish, tibbiyot, turizm, mehmonxona xizmatlari yo‘nalishlarida o‘zaro manfaatli loyihalarni amalga oshirish zarurligi muhokama qilindi.
Misr tomoni mamlakatimizda joriy yilda bo‘lib o‘tadigan muhim siyosiy tadbir – parlament saylovida muvaffaqiyatlar tilab, unda xalqaro kuzatuvchilar sifatida qatnashishga tayyorligini bildirdi.
Muloqot davomida ikki davlat rahbarlari o‘rtasida erishilgan oliy darajadagi kelishuvlarning ijrosini taʼminlash maqsadida tizimli parlament nazoratini o‘rnatish borasida kelishuvga erishildi.
Suhbat yakunida navbatdagi parlamentlararo do‘stlik guruhi yig‘ilishini Toshkent yoki Qohirada tashkil etish, jumladan, tadbirning sanasi va kun tartibi masalalarini diplomatik kanallar orqali muvofiqlashtirishga kelishib olindi.
Izoh (0)