NASA ishtirokida Yevropa kosmik agentligi (YKA) tomonidan yaratilgan Solar Orbiter kosmik kemasi Quyosh janubiy qutbining tarixdagi dastlabki suratlarini oldi. YKA matbuot xizmati ushbu tasvirlarni yulduzni o‘rganishda yangi davrning boshlanishi deb baholagan.
“Bugun biz insoniyat tarixida birinchi marta Quyoshning janubiy qutbi tasvirini taqdim etmoqdamiz. U bizning eng yaqin yulduzimiz, hayot manbai va zamonaviy kosmik hamda yerdagi energiya tizimlarining potensial vayronkoridir. Shuning uchun uning qanday ishlashini tushunishimiz va xatti-harakatlarini bashorat qilishni o‘rganishimiz g‘oyat muhimdir”, deydi YKA fan bo‘yicha direktori Kerol Mandell.
Kema Quyoshning fotosferasi, magnit maydoni va tojini batafsil suratga olishga muvaffaq bo‘lgan. Buning uchun uchta polyarimetrik va gelioseysmik shakllantirgich (PHI), kuchli ultrabinafsha nurlanish shakllantirgichi (EUI) va toj muhiti uchun spektral shakllantirgich (SPICE) kabi maxsus asboblardan foydalanilgan.
To‘plangan ma’lumotlar olimlarga Quyoshning tashqi qatlamlaridagi modda harakatini, shuningdek, ilgari noma’lum bo‘lgan hodisalarni, jumladan qutb gaz uyurmalarini chuqurroq o‘rganish imkonini beradi.
Qo‘shimcha qilinishicha, oktyabr oyida agentlik zondning yulduzning shimoliy qutbidan janubiy qutbiga o‘tishi haqida batafsil hisobot e’lon qilishni rejalashtirmoqda.
Ilgari Milliy quyosh observatoriyasi (AQSH) tadqiqotchilari Quyosh toji — Quyosh atmosferasining tashqi qatlamini o‘rganish uchun yangi texnologiyani qo‘llagan edilar. Buning uchun ular atmosfera buzilishlarini bartaraf etadigan zamonaviy yer teleskoplarining moslashuvchan optikasidan foydalandi. Bu kosmik jismlarning aniqroq tasvirlarini olish imkonini berdi. Olimlar uchun tojning nima uchun uning ostidagi fotosferaga qaraganda issiqroq ekani hamon jumboq bo‘lib qolmoqda. Aynan shu hududda Yerga yetib kelgach, qutb yog‘dusi va geomagnit bo‘ronlarini keltirib chiqaradigan toj massa chiqindilari sodir bo‘ladi.
Izoh (0)