Тошкент шаҳрининг Яккасарой туманида замонавий сув тушар боғ барпо этилади, деб хабар бермоқда туман матбуот хизмати.
Боғ барпо этиш бўйича ўтказилган тақдимотда туман ҳокими Нилуфар Аллабергенова “Пушкин” хиёбонида аҳолига қулайликлар яратиш мақсадида боғ ҳудуди замонавий дизаенда бўлиши ҳақида маълумот берди.
Шунингдек, “Коç Construction” қурилиш компанияси масъули Баҳри Сака учрашув иштирокчиларига боғ ҳудудида олиб бориладиган ишларнинг лойиҳаси билан таништириб ўтди.
Қолаверса, Яккасарой туманидаги Шота Руставели кўчасини 24/7 режимида фаолият юритувчи, гастрономик туризм кўчасига айлантириш лойиҳаси тўғрисида ҳам маълумотлар бериб ўтилди.
Хорижий ва маҳаллий сайёҳлар ташриф буюрадиган туну-кун фаолият кўрсатадиган савдо, кўнгилочар, гастрономик ва туризм кўчасига айлантириш, ушбу кўчадаги мавжуд бино ва иншоотларни замонавий қиёфага келтириш, жумладан, қурилиш-таъмирлаш, реконструкция қилиш ва ҳудудни ободонлаштириш ҳақида таништирилди.
Хабарга кўра, гастрономик туризм кўчасида велосипедлар учун узунлиги 1,6 км махсус йўлак, 40 дона замонавий ўриндиқлар ташкил этилади. Шунингдек, имконияти чекланган инсонлар учун 10 та жойда махсус пандуслар ўрнатилади. Бундан ташқари, 1,5 км майдонда яшил ҳудуд барпо этилади.
Шу билан бирга, автобуслар учун мавжуд 6 та бекат тўлиқ замонавий реконструкция қилинади. Ҳудудда ҳожатхоналар ташкил этилади.
Ҳудуддаги кесиб ўтувчи ер ости йўлакларга имконияти чекланган фуқаролар учун 4 дона пандус қойилади ва 2 та чорраҳадаги ер ости йўлаклари реконструкция қилинади.
Изоҳ (0)