2025 йил 23 июнь куни пойтахтнинг Олмазор туманида жойлашган “Ғалаба” боғи амфитеатрида катта тадбир — “Олмазор ёшларни севади — Битирувчи 2025” шиори остида гала-концерт бўлиб ўтди. Тадбир тумандаги университет, коллеж ва мактаблар битирувчиларига бағишланди.
Мазкур концерт “Долзарб 90 кун” ва “Ёшлар ойлиги” лойиҳаси доирасида ташкил этилди. Кечанинг асосий эътибори — ёшларнинг байрамона кайфияти, ижодий чиқишлари, замонавий мусиқалар ва эстрада юлдузларининг саҳнадаги шоу дастурларида жамланди. Тадбир нафақат байрам сифатида, балки ёшларнинг жамиятдаги фаоллигини юксалтириш, уларга ғамхўрлик муҳитини яратиш, улар билан ишлашдаги янги ёндашувларни намоён этиш имконияти сифатида ҳам катта аҳамият касб этди.
Тадбир доирасида битирувчилар учун махсус безатилган “Битирувчи 2025” аркаси ва қизил йўлак ташкил этилди. Ёшлар бу йўлакдан мусиқа садолари остида ўтиб, ўзларининг унутилмас йилларига хайр деган ҳолда янги ҳаёт босқичига қадам қўйди.
Бу дақиқалар иштирокчиларнинг қалбида узоқ йиллар сақланиб қоладиган ёрқин ва ҳиссиётларга бой хотирага айланди. Ота-оналар, устозлар ва меҳмонлар эса уларни олқишлар билан кутиб олди ва суратга олди. Тадбир ёшларга катта мотивация, ижобий кайфият ва келажакка бўлган ишонч улашди.
Тадбир доирасида ёшлар учун теннис, шахмат каби турли спорт ўйинлари ташкил этилди. Бу эса уларнинг фаол иштирокини таъминлаш, соғлом турмуш тарзини тарғиб қилишга хизмат қилди. Шунингдек, “ВИА Мароканд”, Ёрқинхўжа Умаров, Зиёда, Жаҳонгир Позилжонов, Дилноза ва бошқа кўплаб машҳур санъаткорлар томонидан жонли ижрода куй-қўшиқлар янгради, бу эса кечага янада байрамона тус берди.
Амфитеатрга йиғилган юзлаб ёшлар учун бу кеча нафақат байрам, балки бир босқич ортда қолдирилаётган ҳаёт йўлининг рамзий якунидир. “Битирувчи 2025” шунчаки тантана эмас, балки янги орзулар, режалар ва масъулиятли босқичлар олдидан куч бағишловчи руҳий тайёргарлик сифатида ҳам баҳоланди.
Изоҳ (0)