Ўзбекистон давлат байроғи қабул қилинган кунга бағишлаб, 18 ноябрь куни «Ватанимиз байроғи — фахримиз, ғуруримиз!» шиори остида фестиваль ўтказилади. Бу ҳақда «Дарё»га Мудофаа вазирлиги маълум қилди.
Фестиваль соат 10:00 да Тошкентдаги «Ашхобод» боғи олдидаги улкан байроқ ёнида Мудофаа вазирлиги ва Миллий гвардияга қарашли ҳарбий техникалар, отлиқ бўлинмалар мотоциклларда ҳарбий хизматчилар ҳамда фаол ёшлар иштирокидаги тантанали парад билан бошланади.
Фестиваль иштирокчилари Амир Темур хиёбони бўйлаб ҳаракатланиб, Халқлар дўстлиги санъат саройи ёнида жам бўлади. Соат 11:00 да Халқлар дўстлиги санъат саройи олдида ҳарбий техникалар ва қурол-аслаҳалар кўргазмаси, ҳарбий хизматчиларнинг жанговар чиқишлари, санъаткорларнинг концерт дастурлари бўлиб ўтади.
Шунингдек, шу куни Мудофаа вазирлиги томонидан «Ғалаба» боғи мажмуасида катта байрам тадбири ташкил этилади. Унда «Ватанга қасамёд» маросимининг намойиши, «Турон» ҳарбий театри томонидан саҳна кўринишлари, Марказий ашула ва рақс ансамбли ҳамда ҳарбий оркестрнинг концерт дастурлари, Мудофаа вазирлиги Фахрий қоровулининг чиқишлари, ҳарбий хизматчиларнинг қўл жанги намойиши, замонавий қурол аслаҳалар кўргазмаси намойиш этилади.
Изоҳ (0)