Boston Consulting Group консалтинг компанияси прогнозларига кўра, Ўзбекистон автомобиль бозори 2030 йилгача ҳар йили ўртача 6 фоизга ўсади.
Компания бошқарувчи директори ва ҳамкори Жузеппе Коллинога кўра, бозор ривожланиши учта сценарий асосида баҳоланиши мумкин — асосий, оптимистик ва консерватив — бунда ЯИМ ўсиш суръати, валюта курси ва Марказий банк асосий ставкаси ҳал қилувчи омиллар бўлади.
Унинг қайд этишича, автомобил сектори яқин 3–5 йилда ривожланишига қуйидаги уч асосий тенденция таъсир қилади:
- электромобиллар ва гибрид автомобиллар (ХEV) савдосининг ошиши;
- янада юқори тоифадаги (премиум) моделларга ўтиш;
- SUV (йўл ва йўлдан ташқари —офф-роад ҳайдов учун мўлжалланган) моделларга бўлган барқарор харидорлар талаби.
Коллинонинг фикрича, узоқ муддатли истиқболда бозор таклиф танқислигидан талабга асосланган моделга ўтмоқда.
Бозор янги босқичга киряпти — халқаро ва минтақавий электромобиль брендлари ҳисобига рақобат кучаймоқда. Энди соҳада фақат автомобиль ишлаб чиқарувчилар ўртасида эмас, балки бутун экотизимлар — ишлаб чиқарувчилар, эҳтиёт қисмлар етказиб берувчилар, банклар, илмий-тадқиқот марказлари ва давлат ташкилотлари ўртасида кечадиган рақобат пайдо бўлмоқда. Келажакдаги муваффақият айнан уларнинг мувофиқлаштирилган ҳамкорлигига боғлиқ бўлади.
“Биз бутун дунёдан янги иштирокчиларнинг кириб келаётганини кўряпмиз. Улар соҳа одатий қолипларини буткул ўзгартиряпти — янги маҳсулотларни бозорга тез чиқаришдан тортиб, автомобиллардаги дастурий таъминот ролини кучайтиришгача. Шу билан бирга улар сифатли маҳсулотларни мақбул нархларда таклиф қилмоқда. Рақобат жуда муҳим — айнан рақобат соҳани тирик қилади. Ва биз автомобиль саноатининг иқтисодиётдаги ўсиб бораётган ўрнини тан олишимиз керак”, деган у Тошкентдаги Халқаро Инвестиция Форуми доирасида ўтган “Саноат: янги салоҳиятни кашф қилиш” сессиясида.
Ўзбекистонда электромобиллар истиқболлари
Коллино Ўзбекистонда электромобиллар ва гибрид транспорт воситалари (ХEV) жорий этилишига ижобий қараётганини таъкидлади. Унинг фикрича, бунга туртки берадиган учта асосий омил мавжуд.
Харажатлар — Ўзбекистонда ҳозирнинг ўзида батареяли электромобилга (BEV) эгалик қилишнинг умумий қиймати ички ёнув двигателли автомобилларникидан паст. Бунга арзон электр нархлари ва импорт божларининг йўқлиги сабаб бўлмоқда, буларнинг барчаси ҳеч қандай субсидиясиз эришилган.
Мос муҳит — мўтадил иқлим ва шаҳарлар орасидаги нисбатан қисқа масофа электромобиллар учун қулай шароит яратади.
Зарядлаш инфратузилмаси — бу жуда муҳим афзаллик. Ўзбекистон аҳолиси 70 фоиздан ортиғи шахсий хонадонда яшайди, бу эса тунда уйда зарядлаш имконини беради.
Ушбу омиллар туфайли Ўзбекистон электромобиль улуши тез суръатда ошиши учун структуравий жиҳатдан қулай ҳисобланади. Ҳозирча янги автомобиллар сотувидаги электромобиллар улуши 10 фоиздан кам бўлса-да, соҳада катта салоҳият борлигини кўрсатади. BCG баҳосига кўра, яқин йилларда иқтисодий рағбатлар ва қулай шароитлар туфайли электромобиллар улуши 20–30 фоизгача кўтарилиши мумкин.
Boston Consulting Group — бу дунёнинг энг нуфузли стратегик консалтинг компанияларидан бири бўлиб, 1963 йилда АҚШнинг Бостон шаҳрида Брюс Ҳендерсон томонидан ташкил этилган.
Изоҳ (0)