Ўзбекистондаги автомобиль бозорида ҳозирги шароитда енгил автомобиллар сегментида сотувларнинг умумий ўсиши кузатилмоқда. Бу ҳақда Иқтисодий тадқиқотлар ва ислоҳотлар маркази таҳлилида маълум қилинди.
Қайд этилишича, бу тўрт ойлик фаоллик пасайишидан кейин ижобий кўрсаткичдир. Январь ойида сотувлар ўтган ойга нисбатан 9,5 фоизга ошиб, 78,6 мингта автомобильни ташкил этди, бу бозорда фаолликнинг тикланганлигини кўрсатмоқда.
Ҳудудлар бўйича январь ойида савдоларнинг энг катта ўсиши Сурхондарё – 27 фоиз, Андижон – 25 фоиз ва Наманган – 24 фоизга вилоятларида қайд этилди.
Бирламчи автомобиль бозоридаги вазият
Ўзбекистоннинг енгил автомобиллар бирламчи бозорида ижобий ўзгаришлар кузатилмоқда. Янги енгил автомобиллар савдоси 18,5 фоизга ўсди, бу ўтган ойга нисбатан 4,1 минг донага кўпдир. Қисқа муддатли ижобий тенденцияга қарамай, йиллик кўринишда ушбу бозор сегментидаги фаоллик 15 фоизга камайди.
Январь ойида маҳаллий ишлаб чиқарилган янги автомобиллар савдоси ҳам ижобий динамикани кўрсатиб, 21,7 мингта автомобилни ташкил этди, бу ўтган ойга нисбатан 3,3 мингтага кўп.
Хорижий енгил автомобиллар сегменти ўсиб бормоқда
Йил бошида хорижда ишлаб чиқарилган янги ва фойдаланилган енгил автомобиллар бозорида савдо ҳажми сезиларли даражада ошгани кузатилди. Январь ойида ушбу сегментдаги фаоллик 21 фоизга ўсди, бу 4,9 мингта хорижий автомобиль сотувига тўғри келади.
Бу ўсиш, айниқса, йиллик таққослаш контекстида сезиларли бўлиб, сотувлар ўтган йилнинг шу даврига нисбатан 42 фоизга ошган.
Енгил автомобилларнинг иккиламчи бозори
Январь ойида енгил автомобилларнинг иккиламчи бозоридаги вазият фаолликнинг ошиши билан тавсифланади. Сотувлар 52 мингта автомобилни ташкил этиб, ўтган йилнинг декабрь ойига нисбатан 5,4 фоизга ўсди.
Электромобильлар бозоридаги динамика
Янги ва фойдаланилган енгил электромобиллар сегменти фаоллик билан ўсишни кўрсатмоқда. Йил бошида сотувлар 5,5 минг дона автомобилни ташкил этиб, 24 фоизга ўсди.
Фойдаланилган енгил электромобилларга келсак, уларнинг савдоси йил давомида 3,1 баробар, янгилари эса 1,3 баробар ошди.
Изоҳ (0)