Нью-Йоркдаги Sotheby’s аукционида биринчи марта горгозаврнинг бутун бошли скелети сотувга қўйилди, унинг баҳоси 5—8 миллион доллар. Аукционга қўйилган буюмлар орасида метеоритлар, Ой жинслари ва Ердан ташқарида бўлиб қайтган бошқа нарсалар ҳам бор, деб ёзмоқда Daily Mail.
Sotheby’s ташкилотчиларининг фикрига кўра, коллексионерлар учун энг қизиқарли экспонатлар қуйидагилар бўлиши мумкин: 35 000 долларга сотилиши тахмин қилинаётган 66 миллион йиллик трицератопс бош суяги, қирилиб кетган Америка шерининг 50 минг йиллик бош суяги (экспонат 600 000 долларга баҳоланмоқда) ва мукаммал ҳолатда сақланиб қолган қилич тишли йўлбарс бош суяги.
Natural History гуруҳи горгозавр скелетини аукционининг «юлдузи» деб атамоқда. Унинг ўлчамлари баландлиги 3 метр ва узунлиги 7 метрни ташкил қилади. Мутахассисларнинг фикрича, уни 8 миллион долларга сотиш мумкин. Ҳозирда ушбу экспонат учун энг юқори таклиф 3,5 миллион долларни ташкил қилмоқда.
Шунингдек, кимошди савдосида «Apollon» миссиясида қатнашган астронавт Базз Олдриннинг шахсий буюмлари – парвоз курткаси (бошланғич нархи 700 000 доллар), қулоқчинлар ва у Ойга қўнувчи Eagle двигателларини ишга туширишда фойдаланган ручка ҳам бор. Ручка 2 миллион долларга сотилиши кутилмоқда.
Аукционда коинотга оид яна бир тоифа экспонатлар — осмондан сайёрамизга тушган метеорит парчаларидир. Улардан бири 1969 йил 8 февралда Ерга тушган Аленде метеоритининг парчаси. Олимларнинг фикрига кўра, бу бўлакда қуёш тизими пайдо бўлишидан олдин ўта янги юлдузлар портлаши пайтида яралган зарралар мавжуд бўлиб, у одам қўлига етиб келган энг қадимги материядир.
Экспонатлар орасида метеорит билан тўқнашувдан кейин қулаб тушган Ой юзасининг майда бўлаги ҳам бор.
Онлайн аукционга 20 июлда старт берилган, жонли савдолар 28 июлдан бошланади.
Изоҳ (0)