Америкалик актёр Николас Кейж кимошди савдосида 276 минг долларга сотиб олган, бироқ ўғирланган бўлиб чиққан Tyrannosaurus bataar динозаври бош суягини АҚШ ҳукуматига топширишга рози бўлди. Артефакт Мўғулистонга — ўзи топилган жойга қайтарилади, деб ёзади Reuters.
Актёр бош суягини 2007 йилда Калифорния штати Беверли-Хиллз шаҳридаги I. М. Chait галереясида сотиб олган, унга хариднинг ҳақиқий эканлигини тасдиқловчи сертификат ҳам берилган эди.
2014 йил июлида АҚШ миллий хавфсизлик вазирлиги Кейжни у сотиб олган бош суяги ўғирланган бўлиши мумкинлиги ҳақида хабардор қилди. Кейинроқ буюм Мўғулистондан ноқонуний равишда келтирилгани аниқланди ва актёр уни қайтаришга рози бўлди. Николас Кейж ҳеч қандай қонунбузарликда айбланмади.