Олимлар ўта йирик динозаврни кашф қилиб, уни ХХ аср бошидаги улкан ҳарбий кемалар шарафига Дредноутус (Dreadnoughtus schrani) деб атади. Бу ҳақда Drexel хабар бермоқда.
Унинг скелети жуда яхши сақланганидан, палеонтологлар унинг танаси оғирлиги ва узунлигини осонлик билан аниқлашга муваффақ бўлди: ўлчамлари аниқ бўлган динозаврлар ичида 26 метр узунлик ва 65 тонна оғирлик билан дредноутус энг каттаси бўлди.
«Dreadnoughtus schrani ҳақиқий гигант бўлган. У ўн иккита Африка филлари ёки еттита рекс тираннозаврлари оғирлигига тенг бўлган. Бундан ташқари, скелетнинг ҳолати у вафот этган пайтда ҳали тўлиқ вояга етмаганини кўрсатади», — дея таъкидлади кашфиётнинг етакчи олими профессор Кеннет Лаковара.
Динозаврнинг қолдиқлари кавлаб олиш ишлари 2005—2009 йиллар давомида Аргентинадаги Чубут туманида олиб борилди.
«Бундай ҳажмдаги динозавр ҳеч кимдан қўрқмаган. Бу менга ХХ аср бошидаги зирҳли ва мустаҳкам кемаларни эслатди. Dreadnoughtus — «ҳеч нимадан қўрқмаслик» деганидир», — дея қайд этди Лаковара. Исмдаги қўшимча schrani эса тадқиқотга ҳомийлик қилган тадбиркор Адам Шрен номига қўйилган.
Дредноутус тахминан 77 миллион йил аввал Жанубий Америка жанубидаги мўътадил ўрмонларда яшаган. Динозавр узун бўйни ёрдамида ўз атрофидаги ўсимликларни еган ҳолда деярли бутун кунни бир жойда ўтказган.
Изоҳ (0)