Палеонтологлар ҳозирги Аргентина ҳудудидан илгари номаълум бўлган динозавр турларининг қолдиқларини топди. Унга «Якапил каниукура» номи берилди (Пуэлче халқининг ўлик тилидан таржима қилинганда — «Қалқони бор» деган маънони билдиради).
У, тахминан, 100 миллион йил олдин яшаган, катталиги мушукдек бўлган ва узун орқа оёқларида ҳаракатланган. Бу ҳақда Tjournal нашри хабар бермоқда.
Фото: Визуализация қилинган динозаврнинг янги тури / Tjournal
Якапилларнинг узунлиги бир ярим метрдан ошмаган, оғирлиги тўрт килограммдан етти килограммгача. Ташқи кўриниши аждарларга ўхшаш бўлган — динозаврларнинг бошида ҳамда умуртқа тизмаси бўйлаб тикансимон тожлар жойлашган. Шунингдек, бўйин атрофи, танасининг ён томонлари ва думидаги пластиналар кўплаб йиртқичлардан ҳимояланишга ёрдам берган.
Якапилларнинг ўзи ўтхўр, лекин улар юмшоқ барглар билан эмас, балки чўлларнинг қаттиқ ўсимликлари билан озиқланган. Катта эҳтимол билан улар озиқ-овқат қидириш ва хавфдан қочиш учун кўп ҳаракатланишга мажбур бўлишган. Янги динозавр тиреофорлар гуруҳига киради. Бироқ бошқа турларнинг устунлиги гавдасининг катталиги бўлса, якапилларнинг асосий хусусияти эпчиллик ва тез югуриш бўлган.
Якапил — Лотин Америкасидаги бўр даври тиреофорларининг биринчи вакили. Ушбу турнинг қолдиқлари ўн йил аввал қазишмалар пайтида топилганди, аммо олимлар ҳозирга келиб динозаврни мустақил тур сифатида ажратиб кўрсатиш учун етарли маълумотларга эга бўлишди.
Изоҳ (0)