Саудия Арабистонининг топ клубларидан бири — “Ал-Ҳилол” Италиянинг “Наполи” клуби ҳужумчиси Виктор Осимҳен учун яна бир бор шартнома таклиф қилди. Бу ҳақда Goal нашрига таяниб Championat хабар берди.
Манбага кўра, клуб нигериялик футболчига йилига 50 миллион евро миқдорида маош таклиф қилган. Бунгача 26 ёшли ҳужумчи “Ал-Ҳилол”нинг 30 миллион евролик дастлабки таклифини рад этган эди. Шунингдек, саудияликлар раҳбарияти Викторни қўлга киритиш учун “Наполи” клубига 75 миллион евро миқдорида товон пули тўлашга тайёрлигини билдирган.
Ҳозирча музокаралар давом этмоқда. Агар футболчи ушбу шартномага рози бўлса, битим имзоланиши мумкин. Акс ҳолда, риёдликлар трансфердан воз кечиши ёки янада яхшиланган таклиф билан чиқиши мумкинлиги айтилмоқда.
Ўтган мавсумда Осимҳен Туркиянинг “Галатасарой” жамоасида ижарада тўп сурган. У барча мусобақалар доирасида 41 ўйинда майдонга тушиб, 37 та гол ва 8 та голли узатма муаллифига айланган.
Футболчининг “Наполи” билан амалдаги шартномаси 2026 йилнинг ёзигача мўлжалланган. Transfermarkt портали ҳужумчининг бозор қийматини 70 миллион еврога баҳолаган.
Изоҳ (0)