“Барселона” клуби “Атлетик” (Бильбао) ҳужумчиси Нико Уильямс трансферини 2 июль куни эълон қилишга ҳаракат қилмоқда. Бу ҳақда Mundo Deportivo нашрининг журналисти Ферран Мартинес ўзининг ижтимоий тармоқдаги саҳифасида хабар берди.
Клубнинг асосий мақсади 58 миллион евролик трансферни янги молиявий йилга киритиш бўлиб, яъни харид 2025/26 йил бюджетига ҳисобланади.
Аввалроқ “Барселона” спорт директори Деку футболчининг атрофидаги шахслар билан музокаралар ўтказгани хабар қилинганди. Ўшанда Нико Уильямснинг агенти Каталонияга дўстлари билан кўришиш учун борганини билдирган, аммо Испания матбуоти аслида Деку билан яширин учрашув бўлганини тахмин қилмоқда.
Маълумот учун, 22 ёшли Нико Уильямс ўтган мавсумда “Атлетик” сафида 45 учрашувда майдонга тушиб, ўз ҳисобига 11 та гол ва 7 та ассист ёздириб қўйган. Унинг клуб билан шартномаси 2027 йилнинг ёзига қадар амал қилади. Transfermarkt портали Никонинг қийматини 70 миллион еврога баҳоламоқда.
Изоҳ (0)