“Атлетик Бильбао” клуби футболчиси Нико Уильямс фаолиятини Испаниянинг гранд жамоаларидан бири — “Барселона”да давом эттириш ниятида. Журналист Санти Аунанинг хабар беришича, 22 ёшли вингер “кўк-анорранглилар” сафига қўшилиш учун каталонияликларнинг барча шартларига розилик билдирган.
Маълумотларга кўра, 13 июнь, жума куни футболчининг агенти “Барселона” спорт директори Деку билан шахсан учрашув ўтказган. Нико Уильямс “Барселона” томонидан ўтган ёзда таклиф этилган йиллик 12 миллион евро миқдоридаги маошни қабул қилишга тайёр.
Шунингдек, футболчига Европанинг бошқа топ клублари — Германиянинг “Бавария”, Англиянинг “Арсенал” ва “Челси” жамоалари ҳам қизиқиш билдирмоқда. Аммо Нико фақатгина “Барселона”га ўтишни истамоқда. Шу боис бошқа жамоалар билан музокара ўтказишни хоҳламаяпти.
Нико Уильямснинг “Атлетик” билан амалдаги шартномасида 60 миллион евро миқдорида товон пули белгиланган. Transfermarkt портали унинг бозор қийматини 70 миллион еврога баҳолаган.
Футболчи ўтган мавсум Ла Лига доирасидаги 29 та учрашувда майдонга тушиб, ўз ҳисобига 5 та гол ва 5 та ассист ёздириб қўйган. Унинг клуб билан шартномаси 2027 йилнинг ёзига қадар амал қилади.
Изоҳ (0)