Жанубий Кореянинг таниқли кей-поп гуруҳи BTS 9 июль куни ўзининг YouTube’даги каналида бутун дунё бўйлаб коронавирус пандемиясининг тугаши ҳақидаги клипини эълон қилди. Бир неча соат ичида Permission to Dance («Рақсга тушишга рухсат») қўшиғи 41,5 миллион мартадан ортиқ томоша қилинган, деб хабар беради «Korrespondent.net».
Гуруҳ мусиқачилари қўшиқни британиялик машҳур қўшиқчи Эд Ширан билан ҳамкорликда яратган.
Кадрларда қаҳрамонлар ниқобда кўриниш берган бўлиб, улар орасида бўш шифохоналардаги ходимлар ҳам бор. Аввалига улар рақсга тушган, кейин эса устларидаги ҳимоя ниқобларини ечиб ташлаган.
Таъкидлаш керакки, бу BTS гуруҳининг биринчи рекорди эмас. Аввалроқ улар Butter қўшиғи орқали Гиннеснинг рекордлар китобига киритилган эди — уни YouTube’да бир вақтнинг ўзида 3,9 миллион киши томоша қилган.
Эслатиб ўтамиз, 2020 йилда Time журнали Кореянинг BTS гуруҳини «Йил хонандалари» деб атаганди.
Изоҳ (0)