Болливуд дейилганида кўз олдимизга дарров ранг-баранг фильм кадрлари, ажойиб қўшиқлар, севгига бой ҳикоялар келади. Аммо бу кино дунёсидаги ёрқин актрисалар ортида кўплаб мураккаб қарорлар, зиддиятли муносабатлар ва можаролар яширин. Айрим ҳолларда актрисаларни ҳатто истеъдод ва чирой ҳам муваффақиятга олиб чиқмайди, аксинча, уларнинг йўлини тўсиб қўяди.
Нима учун баъзи режиссёрлар салоҳияти баланд бўлса ҳам, айрим актрисалар билан ишлашни истамайди? Қуйида шу ҳақда сўз боради.
1. Кангана Ранавут — баҳслардан чўчимайдиган “қиролича”
Кангана кучли характерли, фикрини очиқ айтадиган, ҳақиқатни яширмайдиган, қўрқмас аёллардан. “Қиролича”, “Тану ва Ману тўйи” ва “Маникарника” фильмларидаги роллари орқали танилган актриса ўзининг кескин ва очиқ танқидлари билан ҳам машҳур. Ранавут кўп ҳолларда турли тортишув ва жанжаллар марказида юриши эса режиссёрларни қўрқитади.
Болливудда эса таниш-билишчилик ва непотизм кўп нарсани ҳал қилади. Кангана эса бу тизимга доим қарши чиқади. У гендер тенгсизликни доим қоралайди ва кино саноатидаги камчиликларни очиқ айтади. Шу боис, кўпчилик режиссёрлар у билан ишлашни мураккаб деб ҳисоблайди.
2. Приянка Чопра — Голливудга ён босадиган, ўта мустақил актриса
Приянка бир пайтлар ҳинд киносининг энг порлоқ юлдузларидан эди. Кейин эса Голливудда ҳам ўзини синаб кўрди ва у ерда ҳам ўз ўрнига эга бўлди. Чопра “Квантико” сериалида рол ўйнади, блокбастерларда суратга тушди, машҳур хонанда Ник Жонас билан турмуш қурди. Буларнинг барчаси уни халқаро даражада танитди.
Аммо айнан шу муваффақият ҳам уни Болливуддан узоқлаштириб қўйди. Баъзи ҳинд режиссёрлари уни энди “етишиб бўлмайдиган актриса” деб ҳисоблашади, чунки Приянка Чопра талаб қиладиган гонорар нархи баланд, вақти йўқ, бунинг устига, унинг қарашлари ўта ғарбона бўлиб қолган, деган фикрлар бор.
3. Дипика Падуконе — соя солаётган ўтмиш ва депрессия
Дипика Падуконе ҳақиқий актрисалик маҳоратини кўрсатган санъаткор. У “Ом Шанти Ом”, “Бажирао Мастани” ва “Падмават” фильмларида муваффақиятли образлар яратган. Аммо бунга қадар актриса кўплаб қийинчиликлардан ўтган.
У очиқчасига руҳий тушкунлик билан курашгани ҳақида гапирган, бу эса катта жасорат талаб қилади. Шу сабабли айрим режиссёрлар унинг руҳий ҳолати фильмга салбий таъсир қилиши мумкин, деб ҳисоблашади. Бундан ташқари, Ранвир Сингх билан бўлган муносабатлари доимо оммавий ахборот воситаларининг диққат марказида. Бу ҳам янги фильмлар рейтингига путур етказади.
4. Анушка Шарма — мустақил ва ўз йўлини танлаган ижодкор
Анушка нафақат моҳир актриса, балки муваффақиятли продюсер ҳам. У Clean Slate Filmz номли продюсерлик компаниясига асос солиб, бир қанча ноодатий ғояга бой фильмларни суратга олган. Актрисанинг мана шу мустақиллиги ва тадбиркорлиги айрим режиссёрларни чўчитади. Улар Анушка фильм жараёнига ҳаддан ташқари аралашиб, ўз шартларини қўяди деб ўйлашади.
Аслида муаммо нимада?
Болливудда муайян иерархия мавжуд: кўпчилик режиссёрлар йирик компаниялар ва продюсерларга қарам. Улар ҳеч қандай хавф-хатар юзага келишини истамайди ва синовдан ўтган, итоаткор актёрлар билан ишлашни маъқул билади. Айниқса, мустақил фикрли аёллар уларга таҳдид сифатида кўринади.
Изоҳ (0)