Исроил мудофаа кучлари Ливан жанубидаги шиа “Ҳизбуллоҳ” ҳаракатининг ракета бўлинмаси қўмондони Али Тавфиқ Дувайкнинг йўқ қилинганини эълон қилди.
“Исроил армияси Ливан жанубидаги Кфар Жуз ҳудудида “Ҳизбуллоҳ”нинг ўрта масофага учувчи ракета бўлинмаси қўмондони Али Тавфиқ Дувейкка зарба берди ва ўлдирди”, дейилади хабарда.
Ҳисоботда қайд этилишича, Дувейк Исроилнинг шимолий ва марказий қисмига 300 дан ортиқ ракета учирилиши учун масъул бўлган.
Исроил 1 октябрдан бери Ливан жанубида “Ҳизбуллоҳ” кучларига қарши қуруқликдаги операция ўтказмоқда ва қўшни давлатни ҳаводан бомбардимон қилмоқда.
Исроилдаги ҳарбий кампаниянинг асосий мақсади бир йил аввал “Ҳизбуллоҳ” томонидан Фаластиннинг ҲАМАС ҳаракатини қўллаб-қувватлаш учун бошлаган ўққа тутилиши сабабли эвакуация қилинган шимолдаги 60 минг аҳолисини ватанга қайтариш учун шароит яратишдан иборат.
Аввалроқ The Jerusalem Post нашри Исроил мудофаа кучлари Ливанда қуруқликдаги операция бошланганидан бери биринчи марта бу ҳудудга оғир артиллерияни жойлаштиргани ҳақида хабар берган эди
Нашр маълумотларига кўра, якшанбага ўтар кечаси 36-дивизиянинг артиллерия бўлинмалари чегарадан ўтган.
Газетанинг ёзишича, улар ҳозирда чегара ҳудудларида “Ҳизбуллоҳ” ҳаракатининг иккинчи мудофаа чизиғига бостириб кирган Исроил қўшинларига ёрдам бериши режалаштирилган. The Jerusalem Post таъкидлаганидек, гап Исроил мудофаа кучларининг 411- батальони бўлинмалари ҳақида кетмоқда.
12 ноябрь куни Исроил Ливанда қуруқликдаги операциянинг иккинчи босқичини бошлаганини эълон қилганди.
Операциядан мақсад “Ҳизбуллоҳ”нинг ракета қуролларини йўқ қилиш, шунингдек, гуруҳга қўшимча босим ўтказишдир, дея хабар берган Исроил армияси.
Қайд этилишича, Исроил ҳарбий кучлари нафақат Ливан жанубида, балки Байрут ва Бекаа водийсида ҳам ҳаракат қилиб, “Ҳизбуллоҳ”нинг қурол-яроғ омборларини йўқ қилмоқда. Сўнгги бир ой ичида “Ҳизбуллоҳ” Исроил ҳудудига 90 га яқин дрон учирган, уларнинг аксарияти тутиб олингани айтилмоқда.
Изоҳ (0)