Халқаро матбуот марказида ўтказилган анжуманда иштирок этган Ўзбекистон экология ва атроф муҳитни муҳофаза қилиш қўмитаси Тошкент шаҳри атмосфераси ифлосланганлиги даражаси бўйича берилган саволларга жавоб берди. Бу ҳақда ЎзА хабар қилди.
Қўмита вакили Умиджон Абдужалиловнинг фикрича, Тошкент шаҳридаги атмосферани биргина қурилма орқали аниқлаш тўғри натижа бермайди.
Умиджон Абдужалиловнинг қайд этишича, Airvisual.com сайти томонидан аниқланаётган Тошкент шаҳридаги атмосфера бузилганлиги ҳақидаги маълумотлар ўтган йили ноябрь ойидан ижтимоий тармоқларда тарқала бошлаган.
Қўмита вакилига кўра, АҚШнинг Ўзбекистондаги элчихонасида 2018 йил июнь ойида ҳавони ифлосланганлиги кўрсаткичларини аниқлайдиган қурилма ўрнатилган.Ўзбекистон гидрометеорология маркази ҳам 65 та нуқтада бу сингари қурилмаларни ўрнатган. Ушбу қурилмаларнинг 13 таси Тошкент шаҳрида жойлашган.
Қайд этилишича, марказ томонидан бу қурилмалар орқали ҳар куни уч маротаба намуналар олинади. Айрим нуқталарда ўрнатилган қурилмалар кўрсаткичлари меъёрларга нисбатан юқори бўлади. Хусусан, Тошкент шаҳрида ҳам.
Умиджон Абдужалилов бунга сабаб сифатида шаҳарда жуда кўп қурилиш корхоналари иш олиб бораётганини кўрсатди. «Шу сабабли АҚШнинг Ўзбекистондаги элчихонасида ўрнатилган қурилма ифлосланиш даражасини баланд кўрсатмоқда», — дейди қўмита ходими.
Унинг сўзларига кўра, АҚШ ушбу қурилма натижалари асосида Тошкент шаҳридаги ҳавога баҳо бериш мумкин, деган фикрни илгари сурмоқда.
«Бироқ Тошкент шаҳридаги атмосфера ҳолатини биргина қурилма билан аниқлаб бўлмайди. Агар ҳақиқатан ҳам шу кўрсаткич тўғри бўлганида, Тошкент шаҳрида касалликлар сони жуда кўп бўлиши керак эди», — дейди Умиджон Абдужалилов.
Изоҳ (0)