Тошкентнинг Янгиҳаёт туманида янги қурилган уйда аҳоли газ таъминотисиз яшаётгани, кадастр қилинмагани бўйича одамларнинг эътирозлари акс этган видео тарқалди. Тошкент шаҳар Қурилиш ва уй-жой коммунал хўжалиги соҳасида ҳудудий назорат қилиш инспекцияси бунга муносабат билдирди.
Унда қайд этилишича, Янгиҳаёт тумани Йўлдош-6 мавзесидаги ушбу турар жой “Эрам Қурилиш” МЧЖга тегишли бўлиб, объектда қурилиш-монтаж ишлари ҳукуматнинг тегишли қарори асосида инспекцияни хабардор этмаган ҳолда ўзбошимчалик билан бошлаб юборилган. Ушбу ҳолат юзасидан МЧЖга нисбатан 2021 йил 7 июль куни ёзма кўрсатма берилган.
Бироқ белгиланган камчиликлар ўз вақтида бартараф этилмагач, Маъмурий жавобгарлик тўғрисидаги кодекснинг 99-моддаси (шаҳарсозлик тўғрисидаги қонунчиликни бузиш) 7-қисмида назарда тутилган маъмурий ҳуқуқбузарликлар содир этилганлиги сабабли МЧЖ раҳбарига суд органлари томонидан жазо чораси билан боғлиқ қарор чиқарилган. Хусусан, мазкур масала юзасидан Тошкент шаҳар Қурилиш Бош бошқармасига ва Кадастр агентлиги Тошкент шаҳар бошқармасига хатлар жўнатилган.
Шунингдек, 2024 йилнинг 12 июлида ушбу объектга текширув ўтказиш мақсадида чиқилганида қурилиш ишлари тўхтатилгани аниқланган ва қурилишга жавобгар мансабдор шахслар жойига етиб келмагани сабабли холислар иштирокида далолатнома тузилган.
2024 йил 5 ноябрда яна мониторинг ўтказилган ҳамда ҳолат юзасидан “Эрам Қурилиш” МЧЖга ёзма кўрсатма юборилган. Ҳозирги кунда инспекция мазкур ҳолат бўйича суд органларига тегишли тартибда чора кўрилиши юзасидан даъво аризаси киритмоқда.
“Қурувчи ташкилот ва фуқаролар (субинвестор) ўртасида тузилган шартнома шартлари бажарилишини назорат қилиш ҳудудий инспекция ваколатига кирмайди ва мазкур қурилиш объекти инспекция рўйхатидан ўтмагани сабабли уйнинг кадастр ҳужжатларини расмийлаштириб берилиши тадбиркор “Эрам Қурилиш” МЧЖнинг мажбуриятидир”, дейилади муносабатда.
Тошкент шаҳар кадастр бошқармасининг сентябрь ойида эълон қилган ахборотига кўра, пойтахт ҳокимининг 2018 йил июнь ойидаги қарори билан кўп қаватли турар-жой бинолари қуриш учун 2,4 гектар ер майдони доимий фойдаланишга ажратиб берилган.
Қайд этилишича, “Эрам Қурилиш” МЧЖ томонидан ижтимоий ва инвестиция мажбуриятлари бажарилмаган, тегишли ташкилотлардан лойиҳа ҳужжатлари тасдиқланмаган, қурилиш ишлари белгиланган муддатда якунланмаган ва бугунги кунга қадар кадастр ҳужжатларини расмийлаштириш юзасидан мурожаат этмаган.
Қурилиши тугалланган бино-иншоотни фойдаланишга топшириш юзасидан тегишли далолатнома тасдиқлангандан сўнг, ўрнатилган тартибда қурувчи ташкилот номига давлат рўйхатидан ўтказилиши мумкин. Таъкидланишича, бунда фуқаролар томонидан сармоя киритиш ва кўп қаватли турар жой қурилишига улушли иштирок этиш тўғрисидаги шартномалар мулкка бўлган ҳуқуқларни давлат рўйхатидан ўтказиш учун асос бўла олмайди.
Ҳуқуқ турининг вужудга келишини тасдиқловчи ҳужжатлардан бири (қурувчи ташкилот томонидан нотариал идора орқали расмийлаштирилган олди-сотди шартномаси ва х.к.) тақдим этилиб, Давлат хизматлари маркази ёки my.gov.uz орқали мурожаат этилган тақдирда, вужудга келган ҳуқуқ давлат рўйхатидан ўтказилади ва кадастр ҳужжатлари расмийлаштирилади.
Изоҳ (0)