Toshkentning Yangihayot tumanida yangi qurilgan uyda aholi gaz ta’minotisiz yashayotgani, kadastr qilinmagani bo‘yicha odamlarning eʼtirozlari aks etgan video tarqaldi. Toshkent shahar Qurilish va uy-joy kommunal xo‘jaligi sohasida hududiy nazorat qilish inspeksiyasi bunga munosabat bildirdi.
Unda qayd etilishicha, Yangihayot tumani Yo‘ldosh-6 mavzesidagi ushbu turar joy “Eram Qurilish” MCHJga tegishli bo‘lib, obyektda qurilish-montaj ishlari hukumatning tegishli qarori asosida inspeksiyani xabardor etmagan holda o‘zboshimchalik bilan boshlab yuborilgan. Ushbu holat yuzasidan MCHJga nisbatan 2021-yil 7-iyul kuni yozma ko‘rsatma berilgan.
Biroq belgilangan kamchiliklar o‘z vaqtida bartaraf etilmagach, Ma’muriy javobgarlik to‘g‘risidagi kodeksning 99-moddasi (shaharsozlik to‘g‘risidagi qonunchilikni buzish) 7-qismida nazarda tutilgan maʼmuriy huquqbuzarliklar sodir etilganligi sababli MCHJ rahbariga sud organlari tomonidan jazo chorasi bilan bog‘liq qaror chiqarilgan. Xususan, mazkur masala yuzasidan Toshkent shahar Qurilish Bosh boshqarmasiga va Kadastr agentligi Toshkent shahar boshqarmasiga xatlar jo‘natilgan.
Shuningdek, 2024-yilning 12-iyulida ushbu obyektga tekshiruv o‘tkazish maqsadida chiqilganida qurilish ishlari to‘xtatilgani aniqlangan va qurilishga javobgar mansabdor shaxslar joyiga yetib kelmagani sababli xolislar ishtirokida dalolatnoma tuzilgan.
2024-yil 5-noyabrda yana monitoring o‘tkazilgan hamda holat yuzasidan “Eram Qurilish” MCHJga yozma ko‘rsatma yuborilgan. Hozirgi kunda inspeksiya mazkur holat bo'yicha sud organlariga tegishli tartibda chora ko‘rilishi yuzasidan daʼvo arizasi kiritmoqda.
“Quruvchi tashkilot va fuqarolar (subinvestor) o‘rtasida tuzilgan shartnoma shartlari bajarilishini nazorat qilish hududiy inspeksiya vakolatiga kirmaydi va mazkur qurilish obyekti inspeksiya ro‘yxatidan o‘tmagani sababli uyning kadastr hujjatlarini rasmiylashtirib berilishi tadbirkor “Eram Qurilish” MCHJning majburiyatidir”, deyiladi munosabatda.
Toshkent shahar kadastr boshqarmasining sentyabr oyida e’lon qilgan axborotiga ko‘ra, poytaxt hokimining 2018-yil iyun oyidagi qarori bilan ko‘p qavatli turar-joy binolari qurish uchun 2,4 gektar yer maydoni doimiy foydalanishga ajratib berilgan.
Qayd etilishicha, “Eram Qurilish” MCHJ tomonidan ijtimoiy va investitsiya majburiyatlari bajarilmagan, tegishli tashkilotlardan loyiha hujjatlari tasdiqlanmagan, qurilish ishlari belgilangan muddatda yakunlanmagan va bugungi kunga qadar kadastr hujjatlarini rasmiylashtirish yuzasidan murojaat etmagan.
Qurilishi tugallangan bino-inshootni foydalanishga topshirish yuzasidan tegishli dalolatnoma tasdiqlangandan so‘ng, o‘rnatilgan tartibda quruvchi tashkilot nomiga davlat ro‘yxatidan o‘tkazilishi mumkin. Ta’kidlanishicha, bunda fuqarolar tomonidan sarmoya kiritish va ko‘p qavatli turar joy qurilishiga ulushli ishtirok etish to‘g‘risidagi shartnomalar mulkka bo‘lgan huquqlarni davlat ro‘yxatidan o‘tkazish uchun asos bo‘la olmaydi.
Huquq turining vujudga kelishini tasdiqlovchi hujjatlardan biri (quruvchi tashkilot tomonidan notarial idora orqali rasmiylashtirilgan oldi-sotdi shartnomasi va x.k.) taqdim etilib, Davlat xizmatlari markazi yoki my.gov.uz orqali murojaat etilgan taqdirda, vujudga kelgan huquq davlat ro‘yxatidan o‘tkaziladi va kadastr hujjatlari rasmiylashtiriladi.
Izoh (0)