Россия президенти Владимир Путин Озарбайжон президенти Илҳом Алиев билан суҳбат чоғида AZAL самолёти билан содир бўлган фожиали воқеа учун узр сўради. Бу ҳақда Кремль хабар берди.
Давлат раҳбарлари Россия томони ташаббуси билан бўлиб ўтган қўнғироқ чоғида вазиятни муҳокама қилган.
“Владимир Путин фожиали ҳодиса Россия ҳаво ҳудудида юз бергани учун узр сўради ва қурбонларнинг оила аъзоларига яна бир бор чуқур ҳамда самимий ҳамдардлик билдирди, жароҳатланганларнинг тезроқ соғайиб кетишини тилади”, дейилади Кремль хабарида.
Кремлнинг таъкидлашича, Озарбайжон самолёти Грозний аэропортига бир неча бор қўнишга уринган.
“Ўша вақтда Грозний, Моздок ва Владикавказ Украина жанговар дронлари томонидан ҳужумга учраган ва Россия ҳаво ҳужумидан мудофаа тизимлари бу ҳужумларни қайтарган”, дейилади баёнотда.
Тергов қўмитаси томонидан “Ҳаво транспорти ҳаракати ва ҳаракат хавфсизлиги қоидаларини бузиш” моддаси бўйича жиноий иш қўзғатилди.
Озарбайжон Бош прокуратурасининг икки ходими Тергов қўмитаси ва Россия Бош прокуратураси вакиллари билан биргаликда Грознийда ишламоқда. Кремлнинг аниқлик киритишича, самолёт ҳалокатга учраган Оқтовда ҳам тегишли идоралар ҳамкорлик қилмоқда.
Қозоғистондаги авиаҳалокат
Бокудан Грознийга J28243 рейсини амалга ошираётган Embraer 190 самолёти 25 декабрь куни эрталаб Қозоғистоннинг Оқтов шаҳри яқинида ҳалокатга учради. Диспетчерлар Грозний ва Махачқалъада қўнишни рад этганидан кейин лайнер мажбурий қўнишни амалга оширишга уринди. Оқтов аэропортига бир неча километр қолганда у қулаб тушди, портлаб, ёниб кетди.
Бурун қисми тўлиқ ёнган, дум қисмида эса омон қолганлар бўлган. Камида 29 нафар тирик қолган йўловчи айнан шу қисмда бўлган. Улар касалхонага олиб келинган. Azerbaijan Airlines самолёти қулаши оқибатида 38 киши ҳалок бўлган. Самолёт бортида жами 67 киши — 62 йўловчи ва беш экипаж аъзоси бўлган.
Изоҳ (0)