Филиппинда 15 нафар полиция ходими 34 нафар хўрозбознинг ўғирланиши ва ўлдирилишида иштирок этганликда гумон қилиниб, ҳибсга олинди. Бу ҳақда Arab News хабар берди.
Ҳозирда полиция ходимлари сўроқ қилинмоқда. Ўғирланганлар хўроз уриштиришда фирибгарлик қилганликда айбланган. Жасадларнинг баъзилари Манила жанубидаги Таал кўлига ташлаб кетилган, қолганлари эса бошқа жойларда ёқиб юборилган.
Қурбонлар, тахминан, 2021 ва 2022 йилларда Филиппиннинг Лузон ва пойтахт Манила ҳудудларида жойлашган хўроз уриштириш ареналарига кетаётганда ёки қайтишда бедарак йўқолган.
Ушбу бедарак йўқолганлар масаласи яна қайта жамоатчилик эътиборини тортган. Чунки яқинда воқеага гувоҳ бўлган шахс пайдо бўлган. У ўзининг собиқ иш берувчиси, яъни қимор ўйинлари магнатини қотилликларда айблаган.
Миллий полиция бошлиғи генерал Николас Торре матбуот анжуманида асосий гувоҳ муҳим тафсилотларни тақдим этганини билдирган. У Тотой тахаллусидан фойдаланган. Унинг айтишича, хўроз ишқибозларини бўғиб, майиб қилиб ташлаб кетишган.
Гувоҳ собиқ иш берувчиси уни ўлдириш билан таҳдид қилганини билдирган. Шунинг учун у маҳаллий телеканалга мурожаат қилиб, воқеани очиқлаган. Гувоҳ қурбонларнинг қариндошларига ҳамдардлик билдирган.
Адлия вазири Жезус Криспин Ремулланинг маълум қилишича, хўроз уриштириш ареналари ва бошқа гумонланувчилар устидан жиноий иш қўзғатилади. Ушбу ҳодисада иштирок этганликда айбланаётган полиция офицерлари бу айбловларни рад этган. Ремулла қотиллик изларини топиш учун Япония технологиясидан фойдаланилишини маълум қилган.
Қўшма Штатлар ва бошқа Ғарб мамлакатларида хўроз уриштириш тақиқланган. Аммо Жануби-шарқий Осиёнинг кўплаб қисмларида, шу жумладан, Филиппин, Лотин Америкаси ва Европанинг баъзи ҳудудларида бу спорт кўнгилочар ва қимор ўйини сифатида машҳур.
Изоҳ (0)