Актёрлар орасида турли-туман ролларни ижро этса-да, томошабинлар учун биргина образи билан ёдда қолган ижодкорлар ниҳоятда кўп. Улар «ташриф қоғози»га айланган ролларининг яратилишини қуйидагича эслашади.
«30 йилдан бери ака Шарифман»
«Ака Шариф Тошкентда» фильми 1993 йили суратга олинган. Унда бош ролларда бирини ижро этган Ўзбекистонда хизмат кўрсатган артист Толиб Хожиев 30 йилдан буён томошабинларга «Ака Шариф» номи билан таниш. Ажабланарлиси, унга ҳаётда ака Шариф деб мурожаат қиладиганлар кўплаб топилади.
— Толиб Хожиевни унчалик танишмайди, аммо ака Шарифнинг мухлислари кўп. Бу ролнинг яратилишида телевидениенинг собиқ раҳбари Элбек Мусаевнинг хизмати катта бўлган. Ака у бухороча шевада гапирадиган рол ҳақидаги ғояни бермаганида, балки бундай фильм яратилмасмиди?! «Ака Шариф Тошкентда» фильмидаги аввал Шариф ва Маъруф исмли образлар телеминиатюралар театрида намойиш этилган. Ундан кейин Шароф Бошбековнинг ёрдами билан фильм сценарийси ёзилган. Бухороча соф юморга бой фильм сабаб халқ меҳрини қозондим, — дейди актёр Толиб Хожиев.
« ‘Тоғлик куёв’ бўлишни истамагандим»
Йўлчи Ортиқов нафақат актёр, каскадёр ва спорт устаси ҳисобланади. У актёр бўлиб танилмасидан аввал бир муддат каскадёрлик ҳам қилган. «Тоғлик куёв» фильмининг режиссёри Машраб Кимсанов билан Қозоғистонда суратга олиш майдончасида танишган. У Машраб Кимсановга каскадёр бўлиб, унинг «ёниш» саҳнасини ижро этган.
— Ўзбекистон давлат санъат ва маданият институтини тамомлаганимдан сўнг кетма-кет иккита тарихий фильмга таклиф қилишди. 1998 йил раҳматли Шуҳрат Аббосов «Жалолиддин Мангуберди» фильмини суратга олишни режалаштирганди. Худди шу пайтда Ҳабибулла Файзиевнинг «Алпомиш» фильмига таклиф қилиндим. Лекин иккаласида ҳам суратга тушиш насиб қилмади. «Жалолиддин Мангуберди» фильми баъзи сабабларга кўра суратга олинмайдиган бўлди. Афсонавий қаҳрамон Алпомиш фильмда трюкларни бажариши шарт эмас ва кўриниши ҳам бақувват бўлмаслиги кераклиги ҳақида эшитиб, ҳафсалам пир бўлди. Шундан кейин Машраб Кимсанов режиссёрлигида «Тоғлик куёв» телефильми суратга олинадиган бўлди. Унда тоғлик куёв — Холмурод ролига 25 киши синовдан ўтказилиши лозим бўлган. Машраб ака: «Ролга кўринишинг ҳам ижронг ҳам мос келяпти. Сени тасдиқладик», деди. Аммо бу ролда суратга тушгим келмади. Бу рол орқали масхарабозга ўхшаб қоламан, кейинчалик одамлар мени жиддий ролда кўришолмайди, деб ўйлагандим, — дейди актёр Йўлчи Ортиқов.
«Рол учун 8 ой лўлиларни ўрганганман»
Элмира Раҳимжонова «Чархпалак» сериали суратга олинмасидан аввал таниқли эмасди. Бу рол актрисанинг танилишига ва «Лўли Марям» номини олишига сабаб бўлган.
— 1997 йили «Ўзбектелефильм»да «Чархпалак» сериали учун кастинг ўтказилган. Лўли Марям роли учун 30 дан ортиқ актрисалар кастинг топширган. Яратганнинг инояти билан сценарий муаллифи ва режиссёр ролга мени тасдиқлашган. Аммо муаллиф Шароф Бошбеков қатъий талаб қўйган. Яъни сценарийдаги сўзларга ўзгартириш киритмаслигимни ва лўли аёллар феъл-атворини ўрганишимни сўраган. Аслида бу шевада Самарқанд ва Қашқадарёдаги шу миллат вакиллари сўзлашишар экан. Муаллифнинг маслаҳати билан 8 ой давомида лўли аёлларни ўрганишни бошлаганман. Ҳатто съёмка бошланишига бир неча ой қолганда, ҳаётда ҳам шу шевада гаплашганман. «Чархпалак» сериалидан сўнг жуда кўп фильм ва сериалларда суратга тушдим. Аммо томошабинлар учун фақат лўли Марям бўлиб қолдим. Бундан баъзида қувонаман, баъзида эса ранжийман, — дейди актриса Элмира Раҳимжонова.
«Чеча 40 йилда топган онам ҳақида»
Ўзбекистон халқ артист Азиза Бегматова «Отамдан қолган далалар», «Йўл бўлсин» ва «Чашма» каби машҳур фильмларда суратга тушган бўлишига қарамай, томошабинлар тасаввурида фақатгина чеча роли билан гавдаланади.
— Чеча ролининг яратилишида режиссёр Баҳодир Йўлдошевнинг катта ҳиссаси бор. Шу инсоннинг кўмаги билан мен санъатда ўзимни топганман десам хато бўлмайди. Театрда Баҳодир Йўлдошев билан кўп гаплашардик, у ҳаётимга қизиқарди. Меҳрибонлик уйида ўсганим, 40 йил деганда туққан онам билан танишганим, унинг феъл-атвори хуллас ҳаммаси ҳақида унга гапириб берганман. Кейин билсам у инсон буларни жамлаб, спектакль яратишни ният қилган экан. Чеча ролининг прототипи бўлган Қурбоной онамнинг кўриниши, кийиниши ва гап-сўзлари ҳақида гапириб берганман.Ҳар бир актёрнинг ўзига яраша маҳорати бўлади. Режиссёр ўшани кашф этиши керак. Мени Баҳодир Йўлдошев Чеча орқали халққа танитди, — дейди актриса Азиза Бегматова.
«Кичкина табиб»даги Дониёр
— 1998 йилда «Ўзбекфильм»да «Кичкина табиб» фильмига кастинг бўлаётганини айтишди. Унда юзта бола қатнашган бўлса-да, рол менга насиб қилган. Қарасам, ҳаммаси ўзим бир йил олдин телевизорда кўрган актёрларим бўлган. Мурод Ражабовни «Темир хотин»да, Ражаб Адашевни «Абдуллажон»да, Карим Мирҳодиевни «Чархпалак»да кўрганман. Бундан ташқари, Фотима Режаметова, Зикир Муҳаммаджонов, Мунаввара Абдуллаева бор эди, борсам актёрлар ансамбли йиғилган, бу ҳам бир бахт эди. Бу ҳам ўзимни эркин ҳис қилишимга туртки бўлган, улар менга ролни ижро этишимга ёрдам берган.
Ўша пайтда кинолар лентада олинган, хато қилишга ҳаққимиз йўқ эди. Ҳозиргидек эмас эди, бир кун олдин яхшилаб матнни ёдлаб, эртаси куни суратга олиш жараёнларига бориб, ҳолатга кириб ўйналган. «Кичкина табиб»нинг ҳам бир ютуғи актёрлар ансамблининг жам бўлганидадир, жамоа зўр йиғилган эди. Шундан кейин менга «Кичкина табиб»да чиққан бола деб таъриф беришадиган бўлди. Кимдир исмимни билмаса ҳам, Дониёр деб чақирар эди, — дейди Дилшодбек Каттабеков.
«Алфия кампир маҳалладошим эди»
Актриса Барно Тешабоева бир пайтлар Умида Мирҳамидованинг «Оқ атиргуллар» клипида ёш ва чиройли қиз ролини ижро этганлигига ишониш қийин. Аммо у ҳақиқатан ҳам Алфия кампир ролини яратмасидан аввал кўплаб ролларни ижро этган. Аммо унга ҳаммасидан кўра кампир роли омад келтирган.
— 1989 йили институтдаги устозларимиз томонидан ўзига хос рол яратиш борасида топшириқ бўлган. Қайси ролни саҳнага олиб чиқсам экан деб роса бош қотирганман. Шунда маҳалламиздаги татар кампир ёдимга тушиб, уни кузата бошладим. Кийиниши, гапириши, хатти-ҳаракатлари... Хуллас, «Қалпоқ»даги ижодкорлар билан институтда бирга ўқиганмиз. Улар Алфия кампир образини билгач, мени ҳам «Қалпоқ»қа таклиф этишган. Алфия кампир жуда машҳур бўлиб кетди, ҳатто ўз исмим қолиб унинг номи билан чақирадиган ҳам бўлишди, — дейди актриса Барно Тешабоева.
«Мараймамат хўроз сабаб телевизорга чиққан»
«Қалпоқ» кўрсатувининг яна бир вакили Раҳмонали Суропов Мараймамат ролининг яратилишига хўроз сабаб бўлгани ҳақида сўзлаб берди.
— Циркда масхарабоз бўлиб ишлардим. Аммо ҳамма актёрлар каби телевидениега кўрсатув қилиш ниятим бўлган. Аммо у пайтлари вазият анча бошқача эди. Яъни телевидениега кўрсатув қилиш учун жуда кўп тўсиқлардан ўтиш керак эди. Толиб Хожиевнинг ёрдами билан миниатюралар театрида чиққанман, аммо алоҳида кўрсатув қилишнинг гашти бошқача бўлади. Хуллас, раҳбарлар рухсатини олиш учун канал ҳақида ролик суратга олишимни маслаҳат беришни. Бош қотириб, циркда фойдаланадиган катта қорин ва мўйловдан фойдаланадиган бўлдим. Зотдор хўроз олиб, уни бир ой давомида қўлга ўргатдим. Сценарийга кўра, у телевизорни ёқиши ва «Ёшлар» каналини кўришни исташини кўрсатиш керак эди. Аёлим бир хонали уйда хўроз боқишимга жиддий қаршилик қилган. «Мана шу телевидениега интилишимга сўнгги уриниш бўлади», деб жон-жаҳдим билан ҳаракат қилганман. Ҳақиқатан ҳам ролик раҳбарларга ёққан ва кўрсатув қилишимга рухсат беришган. Мараймамат роли худди шу қиёфада «Қалпоқ»қа кўчган, — дейди комик актёр Раҳмонали Суропов.
Мавзуга доир:
Изоҳ (0)