Фарғона вилояти Фарғона туманида қимор ўйини ташкил қилган шахс қўлга тушди. Бу ҳақда вилоят Ички ишлар бошқармаси хабар қилди.
Қайд этилишича, 17 июнь куни туман Фарғона вилояти ИИБ, Миллий гвардия ходимлари томонидан тезкор тадбир ўтказилган. Жараён давомида «Қурилиш» МФЙ ҳудудида яшовчи Қ.А. яшаш уйи ҳовлисида хўроз ўйини учун махсус жой ташкил этиб, фуқаролар Ф.С. ва Р.Ш.ни 1 миллион сўмдан пул тикиб хўрозларини уриштиришларига шароит яратиб бергани аниқланган. Хўроз ўйини учун тикилган жами 5 205 000 сўм пул далилий ашё тариқасида олинган.
Ҳолат юзасидан Қ.А.га нисбатан Жиноят кодексининг 278-моддаси 1-қисми (қиморхона ташкил этиш) билан жиноят иши қўзғатилган. Ҳозирда тергов ҳаракатлари олиб борилмоқда.
Юқоридаги каби жиноятни содир этган шахс етти йилгача озодликдан маҳрум қилиш билан жазоланади.
Изоҳ (0)