Мексикада хўроз уриштириш ўйинлари вақтида оммавий қотиллик содир бўлди

Мексика ғарбидаги Мичоакан штатида ташкил этилган хўроз уриштириш ўйинларида 20 киши ҳалок бўлди, деб хабар беради Reuters.

Қотиллик Лас-Тинахасе шаҳрида содир бўлган. Бу ерда «Янги авлод Халиско картели» (CJNG) гиёҳванд моддалар трафигининг маршрути устидан назоратни қўлга киритиш мақсадида маҳаллий безорилар билан курашмоқда.

Мексика полициясининг маълум қилишича, 19 кишининг — 16 нафар эркак  ва 3 нафар аёлнинг жасади топилган. Қурбонларнинг барчаси ўқотар қуроллар ёрдамида отиб кетилган, бир нафар жабрланувчи шифохонага олиб кетилаётганида вафот этган. Полиция, шунингдек, воқеа жойида бўлган 15 та автомобиль тинтувга олган.

«Бу бир гуруҳнинг бошқаси томонидан қириб ташланиши», — дейди Мексика президенти Андрес Манел Лопес Обрадор. У қурбонлар муносабати билан ҳамдардлик билдирган.

Мексика армияси ва Миллий гвардия қўшинлари ҳужум уюштирганларни қўлга олиш учун шай ҳолатга келтирилган, бироқ ҳозирча улар минтақадаги кўп сонли уюшган жиноий тўдаларнинг қайси бирига тегишли экани аниқ эмас.

Таъкидланишича, хўроз уриштириш ўйинлари мамлакатнинг кўплаб вилоятларида тақиқланганига қарамай, Мексиканинг айрим ҳудудларида оммабоп ўйин-кулги бўлиб қолмоқда ва у одатда яширин тарзда ўтказилади.

Аввалроқ Мексикада криминал суриштирувлар билан шуғулланувчи журналист отиб кетилгани тўғрисида хабар берилганди.