Жиззах вилояти Шароф Рашидов тумани «Улама» қишлоқ фуқаролари йиғини «Қатортол» маҳалласида жойлашган спорт мажмуасида хўроз уриштириш билан шуғулланган шахслар аниқланди. Бу ҳақда Ички ишлар вазирлиги матбуот хизмати хабар қилди.
Маълум қилинишича, спорт майдони 2008 йилда кўпкураш спорт турларини ривожлантириш мақсадида шу маҳаллада турувчи 1968 йилда туғилган фуқаро, айни вақтда Жиззах давлат педагогика университетининг Жисмоний тайёргарлик факультети ўқитувчиси номига туман ҳокимлигидан расмийлаштириб олинган.
Ушбу фуқаро 1970 йил ва 1972 йилда туғилган укалари билан бу ерни бошқариб келган. Улар мажмуани хўроз уриштириш аренасига айлантириб, у ерда ошхона ва дўкон ҳам ташкил қилган. Аренага кирган ҳар бир одамдан эса 20 минг сўмдан пул олган.
Аренада хўроз уриштириш ишлари билан 1982 йилда туғилган, муқаддам жиноят кодексининг 2 та моддаси билан судланган фуқаро ва унинг 2 нафар шериги шуғулланиб келган.
Ички ишлар ходимлари томонидан 2021 йил 6 май куни аниқланган ушбу аренада 63 нафар фуқаро тиббий ниқоб тақмагани учун баённома тузилган. Ўйин ташкилотчисидан 2 миллион 400 минг сўм пул холислар иштирокида ҳужжатлаштириб олинган.
Хўроз жангида иштирок этган 203 нафар фуқаро шахсига аниқлик киритиш мақсадида Жиззах шаҳрига ИИО ФМБга олиб келинди ва уларнинг мамлакат ҳудудидаги содир этилиши фош этилмай қолган жиноятларга алоқадорлигини текшириш мақсадида бармоқ излари олинди.
Текширув давомида икки шахс хўроз жангларида иштирок этиб, вилоят ҳудудида ноқонуний валюта олди-сотдиси билан шуғуллангани аниқланди.
Бундан аввал Самарқандда ўз уйида қиморхона очган шахс аниқлангани, Навоийда ижара уйини қиморхонага айлантирган шахс қўлга олингани ҳамда Самарқандда хўроз уриштириш томошасига келган 51 киши эпидемия қоидаларини бузишда айблангани ҳақида хабар берилганди.
Изоҳ (0)