Самарқандда хўроз уриштириш учун махсус арена ташкил қилган 45 ёшли эркак ушланди

Самарқанд вилояти Ургут туманида хўроз уриштириш учун махсус арена ташкил этган шахс ушланди. Бу ҳақда вилоят ИИБ ахборот хизмати хабар берди.

Қайд этилишича, ИИБ тезкор-қидирув хизмати томонидан тезкор тадбир ўтказилган. Натижада Ургут шаҳрида яшовчи 45 ёшли фуқаро махсус арена ташкил қилиб, хўрозларни пул эвазига уриштириб, қимор ўйинини ўтказаётгани аниқланган.

Суриштирувлар давомида бир неча фуқаро ўзларига тегишли бўлган хўрозларни уриштириш мақсадида олиб келгани маълум бўлган. Таъкидланишича, мазкур ўйинни томоша қилиш учун 200 га яқин одам келган.

Ташкилотчининг ёнидан томошага ташриф буюрган фуқаролардан йиғиб олинган жами 3 миллион 225 минг сўм миқдоридаги пуллар расмийлаштириб олинган. Мазкур ҳолат юзасидан қиморхона ташкил қилган шахсларга нисбатан Жиноят кодексининг 278-моддаси (қимор ва таваккалчиликка асосланган бошқа ўйинларни ташкил этиш ҳамда ўтказиш) 1-қисмига асосан, жиноят иши қўзғатилган. Ҳозирда тергов ҳаракатлари олиб борилмоқда.

Хўроз уриштиришда қатнашган ва ИИО ходимларининг қонуний талабларини бажармаган фуқароларни маъмурий жавобгарликка тортиш учун ҳужжатлар расмийлаштирилиб, суд органларига юборилган.

• Аввалроқ “Халқ банки” ходими 750 миллион сўм пенсия пулларини қимор ўйнаб, ютқазиб қўйгани, 
• Ўзбекистонда қимор ўйинлари иштирокчилари карталаридан пул ўтказмалари тақиқланиши тўғрисида хабар берилганди.