Filippinda 15 nafar politsiya xodimi 34 nafar xo‘rozbozning o‘g‘irlanishi va o‘ldirilishida ishtirok etganlikda gumon qilinib, hibsga olindi. Bu haqda Arab News xabar berdi.
Hozirda politsiya xodimlari so‘roq qilinmoqda. O‘g‘irlanganlar xo‘roz urishtirishda firibgarlik qilganlikda ayblangan. Jasadlarning ba’zilari Manila janubidagi Taal ko‘liga tashlab ketilgan, qolganlari esa boshqa joylarda yoqib yuborilgan.
Qurbonlar, taxminan, 2021 va 2022-yillarda Filippinning Luzon va poytaxt Manila hududlarida joylashgan xo‘roz urishtirish arenalariga ketayotganda yoki qaytishda bedarak yo‘qolgan.
Ushbu bedarak yo‘qolganlar masalasi yana qayta jamoatchilik e’tiborini tortgan. Chunki yaqinda voqeaga guvoh bo‘lgan shaxs paydo bo‘lgan. U o‘zining sobiq ish beruvchisi, ya’ni qimor o‘yinlari magnatini qotilliklarda ayblagan.
Milliy politsiya boshlig‘i general Nikolas Torre matbuot anjumanida asosiy guvoh muhim tafsilotlarni taqdim etganini bildirgan. U Totoy taxallusidan foydalangan. Uning aytishicha, xo‘roz ishqibozlarini bo‘g‘ib, mayib qilib tashlab ketishgan.
Guvoh sobiq ish beruvchisi uni o‘ldirish bilan tahdid qilganini bildirgan. Shuning uchun u mahalliy telekanalga murojaat qilib, voqeani ochiqlagan. Guvoh qurbonlarning qarindoshlariga hamdardlik bildirgan.
Adliya vaziri Jezus Krispin Remullaning ma’lum qilishicha, xo‘roz urishtirish arenalari va boshqa gumonlanuvchilar ustidan jinoiy ish qo‘zg‘atiladi. Ushbu hodisada ishtirok etganlikda ayblanayotgan politsiya ofitserlari bu ayblovlarni rad etgan. Remulla qotillik izlarini topish uchun Yaponiya texnologiyasidan foydalanilishini ma’lum qilgan.
Qo‘shma Shtatlar va boshqa G‘arb mamlakatlarida xo‘roz urishtirish taqiqlangan. Ammo Janubi-sharqiy Osiyoning ko‘plab qismlarida, shu jumladan, Filippin, Lotin Amerikasi va Yevropaning ba’zi hududlarida bu sport ko‘ngilochar va qimor o‘yini sifatida mashhur.
Izoh (0)