“Ливерпуль” жамоаси бош мураббийи Арне Слот, шунингдек, футболчилар Дарвин Нуньес ҳамда Муҳаммад Салоҳ куни кеча ЙТҲ оқибатида вафот этган Диогу Жотани хотирлади.
Жумладан, Арне Слот Жота билан сўнгги суҳбатида уни Порутагилянинг Миллатлар Лигасидаги ғалабаси ва тўйи билан табриклаганини эслади.
“Нима дейман? Бундай пайтда зарба ва оғриққа чидаб бўлмас экан, ким нима дейиши мумкин? Қанийди, қандайдир сўз топиб гапира олсам. Менда бор нарса, биз жуда яхши кўрган инсон ва футболчи ҳақида гапириб беришим мумкин бўлган воқеалардир.
Менинг дастлабки фикрларим футбол менежериники эмас, улар ота, ўғил, ака-ука ва амакиларники деб қабул қилинг. Диогу ва Андре Сильвалар оиласи тасаввур қилиб бўлмас жудоликка учрадилар”, дейди мураббий.
Слот клуб сифатида бу шунчаки шок бўлганини айтди.
“Диогу нафақат бизнинг футболчимиз эди. У барчамиз учун севимли инсон эди. У яхши жамоадош, яхши ҳамкасб эди. У жамоамизга нима олиб келгани ҳақида кўп гапиришим мумкин, лекин Диогу ўйинини томоша қилган ҳар бир киши буни билади. Қаттиқ меҳнат, истак, фидойилик, сифат, голлар. “Ливерпуль” футболчиси қандай бўлиши кераклигининг моҳияти акс этарди.
Ҳамма ҳам кўрмаган жиҳатлар бор. Ҳеч қачон машҳурликка интилмаган, лекин барибир унга эришган одам. Икки кишига эмас, ҳаммага дўст. У ўз оиласи ҳақида қайғурадиган инсон эди”, дейди Арне Слот.
Дарвин Нуньес ҳам Жотанинг фожиали вафоти муносабати билан ҳамдардлик билдирди.
“Мен сени доим табассуминг билан, майдонда ва ундан ташқаридаги яхши жамоадош сифатида эслаб қоламан. Диогунинг оиласига сабр тилайман. Ишончим комилки, у доимо рафиқаси ва болалари билан бирга бўлади”, деган Нуньес.
Муҳаммад Салоҳ гапиришга тил ожиз эканлигини билдирди.
“Кечаги кунгача танаффусдан кейин “Ливерпуль”га қайтишдан қўрқаман деб ўйламагандим. Жамоадошлар келиб-кетади, лекин бундай эмас. Қайтганимизда Диогу у ерда бўлмаслигига кўникиш ниҳоятда қийин бўлади.
Рафиқаси, болалари ва албатта фарзандларидан айрилган ота-онаси билан доим биргаман. Диогу ва унинг укаси Андрега яқин бўлганларнинг барчаси қўллаб-қувватлашга муҳтож. Уларни ҳеч қачон унутишмайди”, дейди мисрлик футболчи.
Эслатиб ўтамиз, Жота 2025 йил 3 июль оқшомида автоҳалокатга учраб, вафот этган. Ушбу йўл-транспорт ҳодисаси натижасида унинг укаси Андре Сильва ҳам ҳаётдан кўз юмган.
Изоҳ (0)