Футбол бўйича Англия Лига Кубоги ярим финалининг жавоб ўйини якунланди. Унда “Ливерпуль” ва “Тоттенҳэм” жамоалари ўзаро тўқнаш келди.
Учрашув Ливерпуль шаҳрида жойлашган Энфилд стадионида бўлиб ўтди. Ўйин мезбонларнинг 4:0 ҳисобидаги йирик ғалабаси билан якунланди.
Учрашувнинг 34-дақиқасида “Ливерпуль” ҳужумчиси Коди Гакпо ҳисобни очди. 51-дақиқада мерсисайдликлар вингери Муҳаммад Салоҳ 11 метрлик жарима зарбасини аниқ амалга ошириб, жамоасининг устунлигини мустаҳкамлади. 75-дақиқада мезбонларнинг ярим ҳимоячиси Доминик Собослаи ҳисобни йирик кўринишга олиб келди. Ўйиннинг сўнгида мерсисайдликлар ҳимоячиси Виржил ван Дейк жамоасининг тўртинчи голини урди.
“Ливерпуль” ва “Тоттенҳэм” ўртасидаги биринчи ўйин 8 январь куни бўлиб ўтган эди. Унда лондонликлар 1:0 ҳисобида ғалаба қозонган. “Тоттенҳэм”нинг ягона голига ярим ҳимоячи Лукас Бергвалл муаллифлик қилган эди.
Арне Слот шогирдлари бош соврин учун курашда ярим финалда “Арсенал”ни мағлубиятга учратган “Ньюкасл” билан тўқнаш келади.
Маълумот учун, “Ливерпуль” ушбу турнирнинг амалдаги ғолиби ҳисобланади. Ўтган мавсум Лига Кубоги финалида мерсисайдликлар “Челси”ни 1:0 ҳисобида мағлубиятга учратган эди.
Англия Лига Кубоги
Ярим финал баҳси
“Ливерпуль” — “Тоттенҳэм” 4:0
6 февраль, пайшанба
Голлар: 1:0 — Гакпо (34), 2:0 — Салоҳ (51, пенальти), 3:0 — Собослаи (75), 4:0 — ван Дейк (80).
“Ливерпуль”: Келлеҳер, Робертсон, ван Дейк (Куанса, 87), Конате, Бредли, Жонс (Мак Аллистер, 72), Гравенберҳ, Собослаи, Гакпо (Диас, 82), Салоҳ (Эллиот, 82), Нунес (Жота, 72).
“Тоттенҳэм”: Кински, Спенс, Дэвис (Мур, 82), Данзо, Грэй, Сарр (Бергвалл, 57), Бентанкур, Биссума (Порро, 57), Кулусевски, Сон, Ришарлисон (Тел, 45+1).
Биринчи ўйин — 0:1.
Изоҳ (0)