Twitter асосчиси томонидан Bitchat Mesh номли офлайн мессенжер ишлаб чиқилди

AppStore’да Twitter асосчиси Жек Дорси томонидан яратилган Bitchat Mesh мессенжери пайдо бўлди. Илованинг ўзига хослиги шундаки, у интернетга боғлиқ бўлмай, фойдаланувчилар ўртасидаги алоқа фақат Bluetooth орқали амалга оширилади.

 

Маълум қилинишича, Bitchat Mesh марказлашмаган, махфийликка йўналтирилган ечим сифатида тақдим этилмоқда. Бу илова рўйхатдан ўтишни талаб қилмайди, серверлардан фойдаланмайди, телефон рақамлари ёки электрон почта манзилларини сўрамайди, хабарларни сақламайди ва фойдаланувчи маълумотларини йиғмайди. Ишга туширилганда фойдаланувчига тасодифий тахаллус берилади, уни ўзгартириш мумкин. Мулоқотни бошлаш учун чапга суриш ёки “Фойдаланувчилар” белгисини босиш кифоя, шундан сўнг яқин атрофдаги тенг ҳуқуқли тармоққа уланган қурилмалар рўйхати очилади.

Bitchat’да хабарлар бошидан охиригача шифрланган. Илованинг ноёблиги шундаки, у тармоқ ретрансляторидан фойдаланади. Хабарлар бир қурилмадан иккинчисига узатилиши мумкин, бу эса интернетга уланмасдан меш тармоғини ҳосил қилади. Бироқ хабарларни узатиш учун иккала иштирокчи ҳам Bluetooth таъсири доирасида бўлиши ёки хабар оралиқ фойдаланувчилар орқали “узатилиши” керак.

Қўшимча функциялар орасида “ваҳима режими” мавжуд бўлиб, у уч марта босиш орқали барча илова маълумотларини ўчириш имконини беради. Bitchat ҳажми атиги 2 МБ ни ташкил этади, бу эса уни чекланган интернет шароитида — масалан, метрода ёки самолёт бортида фойдаланиш учун айниқса қулай қилади.

Эътиборга лойиқ жиҳати шундаки, мессенжер GitHub’да мавжуд бўлган очиқ манба кодига эга.