Ҳиндистон декабрь ойида коинотга робот-гуманоид юборишни режалаштирмоқда. Бу ҳақда Ҳиндистон космик тадқиқотлар ташкилоти (ISRO) раҳбари Ви Р. Нараянан маълум қилди.
Маълум қилинишича, ушбу миссия Ҳиндистоннинг биринчи инсон бошқарадиган “Гаганян” космик миссиясига тайёргарликнинг янги босқичи бўлади.
Вёммитра (санскритча Вёма — коинот, Митра — дўст) номли аёл қиёфасидаги робот-гуманоид капсулада мустақил парвозни амалга ошириш учун махсус ишлаб чиқилган. Робот коинот шароитида кеманинг барча асосий тизимларини — ҳаётни таъминлаш тизимларидан тортиб парвозни бошқариш тизимларигача текшириши кўзда тутилган.
“Агар миссия муваффақиятли ўца, келаси йили яна иккита пилотсиз миссияни амалга оширамиз. 2027 йил март ойида барча синовлар якунлангач, бош вазир Нарендра Моди эълон қилганидек, “Гаганян”нинг асосий инсон бошқарадиган миссияси ишга туширилади”, деди ISRO раҳбари.
2018 йил август ойида Ҳиндистон бош вазири Нарендра Моди илк бор ўз мамлакати орбитага биринчи миллий космик экипажни юборишини расман эълон қилган эди. Унинг тўрт нафар аъзоси аллақачон Россиянинг Юлдузли шаҳарчасида тайёргарликдан ўтган ва ҳозирда Ҳиндистонда машғулотларни давом эттирмоқда. “Гаганян” лойиҳасининг номи (санскритча “гагана” — осмон сўзидан олинган) “осмон кемаси” деган маънони англатади.
Изоҳ (0)