АҚШ Украинага хизматдан чиқарилган ва парвозга яроқсиз F-16 самолётларини юбормоқда. Қирувчилар Аризона штатининг Давис-Монтҳан ҳаво базасидаги “бонеярд” (авиация қабристони)дан олиб, эҳтиёт қисмлар сифатида Украинага жўнатиляпти.
АҚШ ҳарбий ҳаво кучлари вакилига кўра, бу самолётлар 309-Аэроскосмик техник хизмат ва тиклаш гуруҳига тегишли бўлиб, улардан ажралган деталлар Украинага Европа мамлакатлари томонидан етказиб берилган F-16 қирувчиларини жанговар ҳолатда ушлаб туриш учун ёрдам беради. Бироқ ҳаво бортлари двигатель ва радар каби қимматли қисмлардан аллақачон маҳрум бўлган.
“Бу самолётлар бутунлай фаолиятдан чиқарилган, уларни жанговар ҳолатга қайтариб бўлмайди,” дейди ҳаво кучлари вакили.
Бундан бир оз олдинроқ АҚШ давлат департаменти Украина билан 310,5 миллион долларлик ҳарбий савдо битимини тасдиқлаган эди. Келишув эҳтиёт қисмлари, техник ҳужжатлар, дастурий таъминот, модернизация ускуналари, учувчилар ва техник ходимлар учун тренингларни ўз ичига олади.
АҚШ Давлат департаменти “қудратли Украина Европада сиёсий барқарорлик ва иқтисодий тараққиётни таъминлаш” учун муҳимлигини таъкидлаб, мазкур ёрдам мамлакат ташқи сиёсат мақсадларига мос тушишини айтди.
Изоҳ (0)