АҚШнинг B-2 Spirit стратегик стелс-бомбардимончиси душман йирик сув усти кемаларини йўқ қилишга мўлжалланган қудратли Quicksink авиабомбасини синовдан ўтказди Бу ҳақда АҚШ ҳарбий-ҳаво кучларига асосланиб Newsweek нашри маълум қилди.
“Биз ҳаракатсиз ёки ҳаракатланаётган кемаларга зарба бериш қобилиятимизни сезиларли даражада оширадиган янги Quicksink қуролини яратдик”, деди АҚШ ҳарбий-ҳаво кучлари штаби бошлиғи генерал Девид Аллвин.
АҚШ ҳарбий-ҳаво кучлари тадқиқот лабораторияси пресс-релизида таъкидланишича, Американинг кўринмас бомбардимончиси яқинда Тинч океанида АҚШга қарши турган Хитой ҳарбий-денгиз кучларининг тез суръатда кучайиши шароитида ҳарбий кемаларни чўктиришга мўлжалланган “инқилобий” қуролни синовдан ўтказган. Quicksink деб номланувчи янги қурол денгиздаги нишонларни “тез ва самарали” чўктира олади.
“Ҳозирда Хитой ҳарбий-денгиз флоти 370 та кема ва сувости кемасидан иборат бўлиб, АҚШ ҳарбий-денгиз кучлари таркибидан сон жиҳатидан устунлик қилмоқда”, дея таъкидлайди нашр.
Quicksink бу — арзон, юқори аниқликдаги авиабомбани яратиш дастури бўлиб, унинг ошкор этилмаган хусусиятлари туфайли катта жанговар кемаларни йўқ қилиши кафолатланган.
АҚШ Ҳарбий-ҳаво кучлари тадқиқот лабораторияси маълумотларига кўра, авиабомба синови апрель ойи охирида Атлантика океанидаги Флорида яқинида, шунингдек, ўтган йили Тинч океанида ўтказилган.
Изоҳ (0)