Сурия 10 июнь куни аёллар учун пляжда консерватив янги кийиниш тартибини эълон қилди. Бу ҳақда CNN хабар берди.
Унга кўра, аёллар барча жамоат пляжларида буркинида (танани бутунлай ёпадиган сузиш кийими) юришлари шарт. Бу 2024 йилнинг декабрь ойида исломий исёнчилар Башар Асад режимини ағдарганидан бери сўнгги маданий ўзгариш ҳисобланмоқда. Туризм вазирлиги янги тартиб “жамоатчилик манфаатлари талаблари” асосида ишлаб чиқилганини маълум қилган.
“Жамоат пляжлари ва бассейнларига ташриф буюрувчилар — хоҳ сайёҳлар, хоҳ маҳаллий аҳоли бўлсин — жамоатчилик диди ва жамиятнинг турли қатламларининг ҳис-туйғуларини ҳисобга олган ҳолда тегишли сузиш кийимларини кийишлари шарт. Пляж ва бошқа жойлар ўртасида ҳаракатланаётганда аёллар чўмилиш костюмлари устидан ёпинчиқ ёки кенг халат кийиши лозим”, деди туризм вазири Мазен ал-Салханий.
Эркаклар ҳам янги тартиб бўйича кўйлак кийишлари шарт. Сув ҳавзалари, меҳмонхона вестибюллари ва умумий овқатланиш жойларидан ташқаридаги жамоат жойларида устки кийимсиз юришга рухсат берилмаслиги ҳам таъкидланган.
“Пляж ва бассейнлардан ташқари жамоат жойларида елка ва тиззаларни ёпиб турадиган кенг кийим кийиш, шаффоф ёки ҳаддан ташқари тор кийимлардан воз кечиш афзал”, дея эркакларга кўрсатма берилган.
Шу билан бирга, вазирлик халқаро ва премиум (4 юлдузли) тоифадаги дам олиш масканлари ва меҳмонхоналарда, шунингдек, хусусий пляжлар ва бассейнларда одатий Ғарб чўмилиш кийимларига рухсат берилиши айтилган. Хавфсизлик қўриқчилари ва пляж назоратчилари қоидаларга риоя қилинишини таъминлаш учун одамларни кузатиши таъкидланган.
Изоҳ (0)