Исроил Эронга қарши “бир нечта сюрпризлар”дан иборат янги операция тайёрлади. Бу ҳақда Исроилнинг АҚШдаги элчиси Йехиэл Лейтер маълум қилди.
Элчининг сўзларига кўра, мазкур операция Исроил 2024 йил Ливандаги “Ҳибзуллоҳ” аъзоларининг пейжерларини оммавий портлатганидан ҳам кучлироқ бўлади.
Биз бир нечта сюрприз тайёрладик. Пайшанба, жума кунлари вазият тинчиганида бир нечта сюрпризларни кўрасиз, улар фонида пейжер операцияси деярли оддий бўлиб кўринади, деди Исроилнинг АҚШдаги элчиси Йехиэл Лейтер.
Ўз навбатида, Эрон яқин соатларда Исроилга кучлироқ зарба беришга тайёрланмоқда. Бунда янги замонавий ва юқори аниқликдаги қуролларни қўллаш режалаштирилган. Бу ҳақда Эрон армиясининг қуруқликдаги қўшинлари қўмондони Амир Ҳайдарий маълум қилди.
Қуролли кучлар, айниқса, армиянинг қуруқликдаги кучлари томонидан янги ва илғор қуроллар билан шиддатли ҳужумларнинг янги тўлқини бошланди ва яқин соатларда кучаяди, деди у.
Маълумот ўрнида, 2024 йил 17 сентябрь куни Ливанда “Ҳизбуллоҳ” аъзолари фойдаланган юзлаб пейжерлар портлади. Эртаси куни бутун мамлакат бўйлаб бошқа электрон қурилмалар, жумладан, ноутбуклар ва рациялар портлай бошлади. 30 дан ортиқ киши ҳалок бўлди, минглаб одамлар жароҳатланди. Исроил разведкаси қурилмаларни “Ҳизбуллоҳ”га етказиб берилишидан олдин қўлга киритган. Уларнинг батареяларига портловчи моддалар ўрнатган ва кейин уларнинг ҳароратини масофадан бошқариб оширган.
Исроил ва Эроннинг ўзаро ҳужумлари 13 июнга ўтар кечаси бошланди. Яҳудий давлати “Исёнкор шер” операциясини олиб бормоқда. Унинг доирасида Исроил қўшинлари Эрон ҳудудидаги ядровий ва ҳарбий объектларга ҳужум қилмоқда.
Эрон олий раҳнамоси фуқароларга йўллаган мурожаатида Исроилнинг Эронга берган зарбаларини жиноят деб атаган. У Исроилни “аччиқ ва даҳшатли тақдир” кутаётганини таъкидлаган. Теҳрон “Ҳақиқий ваъда 3” номли операцияни бошлаган. Унинг доирасида Исроилга юзлаб ракеталар учирилган. Икки давлат бир-бирига ҳужум қилишда давом этмоқда.
Изоҳ (0)